Хоёр хуруугаа тайруулаад байгаа Н.Энхбилэг охины хөл нь үхжиж эхэлжээ

Өнгөрсөн аравдугаар сарын 7-ны өдөр  Баянхонгор аймгийн VI  сургуулийн долдугаар ангийн сурагчид ангиараа сахуу татрангийн вакцин хийлгэсэн байдаг. Гэтэл вакцин хийлгэсэн өдрөөс эхлэн тус ангийн сурагч Н.Энхбилэг охины гар нь хавдаж эхэлж, улмаар биеийн байдал нь маш муу байдалтай байгаа талаар мэдээлэл хэвлэлээр дамжин нийтэд хүрээд багагүй хугацаа өнгөрч байна. Эх хүүхдийн эрүүл мэндийн төвийн эмч нар Н.Энхбилэг охины биеийн байдал муудсан шалтгааныг вакцинаас болоогүй “Системийн васкулит” гэх эдгэршгүй өвчин туссан гэж хэлээд байгаа. Эх нялхаст хэвтсэнээсээ хойш ийм оноштойгоор эмчлүүлж байгаа охин хоёр хурууныхаа нэгдүгээр үеийг тайруулаад байгаа талаар бид өмнө нь мэдээлсэн. Харин одоо охины биеийн байдал хэр байгаа талаар Н.Энхбилэг охины аав Д.Намжилдоржоос тодрууллаа.

-Эх нялхасын эмч нар Н.Энхбилэг охиныг системийн васкулит гэдэг эдгэршгүй өвчин туссан. Оношийнхоо дагуу холбогдох эмчилгээг хийж байгаа гэсэн. Охины хувьд өмнө нь бие нь өвдөж байсан уу?

-Тийм юм байхгүй. Охиноо би долоон нас хүртэл өсгөж торниулсан эцэг хүний хувьд баттай хэлж чадна. Ханиад хүрдэггүй хүүхэд гэж юу байхав, ханиад хүрэхээрээ гэрээрээ эм уугаад зүгээр болчихдог байсан. Манай охин гурван нас хүртэлээ бүх вакцинд хамрагдсан.

-Вакциныг хийх ёстой эмч нь хийгээгүй гэж яригдаад байгаа. Яг ямар хүн вакцин хийсэн вэ?

-Тухайн вакциныг хийхэд өрхийн сувилагч, сургуулийн эмч хоёр байсан гэсэн. Охиныхоо ангийн хүүхдээс асуухад  манай охиныг сургуулийн эмч тариад, өрхийн сувилагч нөгөө хүүхдийг нь тарьсан гэсэн. Тэгээд манай охиныг хэн тарьсан бэ гээд асуухад өрхийн эмч би тарьсан гэж хэлсэн. Гэтэл манай охин өрхийн сувилагч тариагүй, сургуулийн эмч тарьсан гэж хэлсэн.

-Охины гарт үхжилт явагдаж хоёр хуруугаа тайруулаад байгаа. Цаашид бусад хуруугаа  тайруулахгүйн тулд ямар эмчилгээ хийж байна вэ?

-Охины минь гарт үхжилт явагдаад хоёр хурууны эхний үеийг нь тайруулаад байсан. Үлдсэн найман хуруу нь зүгээр байсан боловч одоо үхжилт өгөөд эхэлсэн. Голын хуруу нь мөн үхжилт өгөөд харлаад эхэлсэн. Гарны хуруунуудад үхжилт өгөөд зогсохгүй хөлний хуруунуудад бас үхжилт явагдаж эхэлсэн. Одоо хөл гэж уйлаад өвчин намдаагч байнга хэрэглэж байна. Охины биеийн байдал хүндрэх тал руугаа орчихлоо. Баруун талын хөл нь урд шөнө хавдаж хоносон. Хөл нь хавдаад хөх юм болчихсон. Яг хөхрөөд ирэхээрээ л үхжилт өгдөг.

-Эх нялхасын эмч нар оношоо тодруулаад шинжилгээ аваад эмчилгээ хийж байгаа. Эмчилгээний үр дүн хэр байна вэ. Эмнэлгийн удирдлагын зүгээс юу гэж байна вэ?

Эх нялхасын эмч нарын тавьж байгаа оношоор гурван сар эмчилгээ хийлгэлээ. Ямар ч үр дүнд хүрсэнгүй. Эхлээд хүүхдийн хэлэнд нь үхжилт өгөөд муухан ярьдаг байсан. Бусдаар бол охины бие зүгээр байсан. Гэтэл одоо гар, хөл нь үхжилт өгөөд биеийн байдал хүнд болчихлоо гэж захиралд нь хэлсэн. Эмнэлгийн удирдлагын зүгээс бүх арга хэмжээг авсан. Эмч нар мухардах талдаа ороод байна. Одоо өвчин бүдүүн судсандаа орох юм бол танай хүүхдийг аврахад хэцүү болно гэж хэлсэн.

-Та төрийн гурван өндөрлөгт болон Эрүүл мэндийн сайдад хандаад байгаа. Салбарын сайд ирж уулзана гэсэн үү?

-Эрүүл мэндийн сайд Н.Удвал нэгдүгээр сарын 01-нд Эх нялхасын эмнэлэгт ирсэн байсан. Эрүүл мэндийн сайд Н.Удвалыг охинтой минь орж ирж уулзана гэж мөн ч их горьдсон доо. Эх нялхаст ороод ирчихсэн явж байна гэхэд охиныхоо биеийн байдлыг танилцуулах гээд хүлээгээд байж байтал уулзаагүй яваад өгсөн. Эх хүүхдийн эрүүл мэндийн төвийн захирал орж ирээд сайдын ажил их, цаг нь давчуу байлаа. Он гарсан учраас тайлан тооцоо их байгаа учраас ажил нь амжсангүй. Танай хүүхдийг сайдад танилцуулсан, ерөнхийдөө сайд мэдэж байлаа. Нэг сар гаргаад ирж уулзана гэж байна гэж хэлсэн. Мэдээж төрийн гурван өндөрлөгт ханддаг учир нь бага ч гэсэн миний охинд анхаарал тавиач, амьдрал хайрлаач гэж хандсан.

-Н.Энхбилэг охин танай хэд дэх хүүхэд вэ?

 -Би хоёр охинтой. Том нь Н.Энхбилэг бага нь долоон настай хоёрдугаар ангийн сурагч. Бага охин маань аав, ээжтэйгээ байж байгаад саяхан Баянхонгор аймаг руу явсан.

-Сахуу татрангийн вакциныг өмнө нь танай охин  хийлгэж байсан уу?

-Охин маань гурван настай байхдаа сахуу татрангийн вакциныг хийлгэж байсан. Тухайн үед би өөрөө охиноо авч очиж хийлгэж байсан. Надад эмч хэлэхдээ сахуу татрангийн вакциныг 3, 7, 15 настайдаа хийлгэдэг гэж хэлсэн.