“Нарантуул”-ын зулбуулах эмнээс болж таван бүсгүй амиа алджээ

Үр хөндөлт гэх ойлголт нийгмийг цочроохоо нэгэнт больсон. Хүсээгүй жирэмслэлт, гэр бүл салалт, хүчирхийллээс болж хэчнээн эмэгтэй үр хөндүүлж, үүнээс болж амиа алдсаныг яг таг гаргасан тоо баримт ч байхгүй биз. Шинжлэх ухаан аль хэдийнэ жирэмслэлтээс хамгаалах олон аргыг нээж дэлхий даяар тархсан байтал эмэгтэйчүүд эрүүл мэндийн мэдээлэл, мэдлэг дутуугаасаа болж өөрсдөө “хор” худалдан авч “амиа егүүтгэх” болжээ.

Хэн нэгний ам даган баталгаагүй үр зулбуулах эмийг авч хэрэглэдэг байна. Харамсалтай нь чанарын баталгаагүй, хууль бус эм бүсгүйчүүдийн алтан аминд хүрсээр байна. Эдгээр эмүүдийг барааны дэлгүүрийн лангуун дор, хүнсний захын үүдэнд хувь хүмүүс зарж байгаа нь улам ч их эрсдэл дагуулж байгаа юм.

Үүний баталгаа бол өнгөрсөн жил 15 бүсгүй үр зулбуулах эм хэрэглэснээс болж амиа алджээ. Үүнээс таван нь “Нарантуул”  зах дээрээс уг эмийг худалдан авсан байна. Мөн энэ эмнээс болж эрүүл мэндээрээ хохирч, дахиад хүүхэд гаргаж чадахгүй болсон эмгэнэлтэй тохиолдол хэдэн зуугаараа тоологдоно. Хууль хяналтынхан үүнтэй тэмцэж байгаа гэдэг. Гэтэл харин ч зах зээл нь улам өргөжиж, нийлүүлэгчийн тоо олширсныг дээрх жишээ харуулж байна.