БНХАУ-д 6300 монгол оюутан суралцаж байна
Монгол Улсын Их Хурлын дарга, Монгол Ардын намын дарга Н.Учрал ХКН-ын урилгаар 2026 оны 3 дугаар сарын 22-24-ний өдрүүдэд БНХАУ-д хийсэн айлчлалын хүрээнд (2026.03.24) тус улсад суралцаж буй монгол оюутнуудын төлөөлөлтэй уулзалт хийлээ.
Улс орныхоо хөгжлийн ирээдүйг түүчээлэх оюутан залуустаа цаг гарган, төрийн бодлого, шийдвэрийн талаар танилцуулж, санал бодлыг нь сонсохоор уулзаж буйд Бээжин дэх Монголын оюутны холбооны дарга О.Хүсэлбаатар уулзалтад оролцож буй оюутнуудаа төлөөлөн Улсын Их Хурлын дарга Н.Учралд талархал илэрхийлсэн.
Уулзалтын үеэр БНХАУ-д суралцаж буй оюутнууд эх орондоо дадлага хийх "100+100” хөтөлбөрийг эхлүүлж байгаагаа Улсын Их Хурлын дарга танилцууллаа.
Тэрбээр одоогоос 20-иод жилийн өмнөх интернэт хэрэглээний талаар дурсамжаа залуустай хуваалцаад “Өнөөдөр гар утаснаасаа интернэт орж, олон улсын мэдээ, мэдээллийг хүссэн үедээ чөлөөтэй авдаг болсон. Өөрчлөлт, шинэчлэлт өдөр тутамдаа нүдэн дээр өрнөж байгаа ч бид тэр бүр анзаардаггүй. Монгол Улс 10 жилийн өмнө ямар байсныг, өнгөрсөн жилээс өнөөдрийн хооронд хэрхэн өөрчлөгдөж, хөгжсөнийг ярьдаггүй. Тиймээс оюутнууд Та бүхэн Монгол Улсын хөгжил дэвшлийг хөндлөнгөөс үнэлэн харж, өдөр тутмын хөгжил, өөрчлөлтийг анхаарч, ирээдүйд хэрхэн хувь нэмрээ оруулах талаар бодож, хичээж суралцаарай” хэмээн захив.
Хувь хүний болон улс орны хөгжил нь тасралтгүй хөдөлгөөн гэдгийг онцлоод "10 жилийн өмнө Монгол Улсын дотоодын нийт бүтээгдэхүүн 29 их наяд төгрөг байсан бол өнөөдөр 89.9 их наяд төгрөгт хүрсэн. Бүх аймаг, сум авто замаар холбогдож, аль ч суманд гар утас, интернэт хэрэглэж байна" гэв.
Мөн тэрбээр оюутан залуусын оюун санаа, мэдлэг боловсрол, эзэмшиж буй чадвар дээр Монголын ирээдүй оршин тогтнож байгаа хэмээгээд "Эцэг, эх, гэр бүл, улс орон чинь та бүгдийг ирээдүйгээ хэмээн харж, бүх боломжоороо дэмжиж байгаа. Техник, технологийн дэвшилд суурилсан мэдээ мэдээллийн дунд бид амьдарч байгаа учраас шүүмжлэлт сэтгэлгээ, эргэцүүлэх, дүн шинжилгээ хийх чадвараа хөгжүүлж ирээдүйгээ, нийгмээ жолоодох болно. Мэдлэг, ур чадвараас илүүтэй хандлагыг чухалчилдаг цаг үе Та бүхнийг угтаж байна. Монголчууд оюун, сэтгэлгээний чадвар өндөр ч сахилга бат, тууштай байдлын үр дүнд хүрдэг мэдлэгээ хэрэглээ болгох чадвараа хөгжүүлэх шаардлагатай" гэдгийг уулзалтад оролцсон оюутнуудад Улсын Их Хурлын дарга захиж байв.
Улсын Их Хурлын дарга Н.Учрал төрийн үйлчилгээний цахимжилтын талаар, И-Монголиа-д оюутнуудын хэрэгцээт төрийн үйлчилгээг нэгтгэсэн “Оюутан” цэсний талаар мэдээлэл өгөв. Улмаар уг цэсэд гадаадад суралцаж буй оюутан залуусын хөдөлмөр эрхлэлтийг дэмжих, төрийн үйлчилгээг хялбарчлах, боловсрол, карьер, дадлага, төрийн дэмжлэгийн талаарх мэдээллийг нэгтгэсэн “E-Student 2.0” хөгжүүлэлт хийж байгааг танилцууллаа.
Түүнчлэн Улсын Их Хурлаас захиалан гүйцэтгүүлсэн бүх судалгааг parliament.mn сайтад нээлттэй байршуулсан, мөн sudalgaa.gov.mn цахим санд давхар байршуулсан болохыг дурдаад энэ нь гадаад улс орнуудад суралцаж буй оюутнууд мэдээллийн чухал эх сурвалж болно хэмээн найдаж байна гэв.
БНХАУ-д суралцаж буй 6300 монгол оюутны 40 хувь нь бакалавр, 20 хувь нь магистрын түвшинд суралцаж байна. Гадаадад суралцаж буй оюутнуудын өмнө нийтлэг тулгардаг асуудал олон бий. Төрийн үйлчилгээ авахад мэдээлэл олдоцгүй, эх орондоо эргэн ирээд ажиллах боломжийн талаар ойлголт дутмаг, мэргэжлийн дадлага хийх, төрийн байгууллагуудтай холбогдох, бодлогын мэдээлэл авах сувгууд салангид байдаг. Заримдаа оюутан өөрийн мэргэжлээр хаана, хэрхэн хөгжихөө бусдаас асууж, таамгаар шийдэхээс өөр сонголтгүй үлддэг.
Иймд хэрэгцээ шаардлагад тулгуурлан E-Mongolia дотор “E-Student 2.0” платформыг нэвтрүүлж байна. Энэхүү систем нь гадаадад суралцаж буй залууст боловсрол, карьер, дадлага, хөдөлмөр эрхлэлт, төрийн үйлчилгээ, төрийн дэмжлэгтэй холбоотой мэдээллийг нэг дороос авах боломжийг бүрдүүлнэ. Оюутан хаана сурч байгаагаас үл хамааран төрийн үйлчилгээг цахимаар авах, ажлын байр, дадлагын мэдээлэлтэй эрт танилцах, эх орондоо эргэн ирээд ямар салбарт оролцохоо төлөвлөх, төрөөс хэрэгжүүлж буй бодлого, боломжуудтай цаг алдалгүй холбогдох нөхцөл бүрдэнэ.
Улсын Их Хурлын Тамгын газраас хийсэн бүх судалгааг parliament.mn сайтад нээлттэй байршуулсан билээ.
Үр дүнд гадаадад байгаа оюутнууд эх орныхоо хөгжлийн бодлогыг бодит эх сурвалжаас ойлгодог, шийдвэрийн орчинтой холбогддог шинэ боломж бүрдсэн. Цаашид БНХАУ-д суралцаж буй оюутнууд эх орондоо дадлага хийх "100+100” хөтөлбөр SDS, SDY, SDW хамтран хэрэгжүүлэхээр боллоо.
Сэтгэгдэл ( 0 )