М.Энхболд: Төр тогтвортой бол төгрөг ч бас тогтвортой

 Монгол Улсын Ерөнхийлөгчийн сонгуульд нэр дэвшигч МАН-ын дарга М.Энхболд Тусгаар тогтнолын ордноо сонгуулийн сурталчилгаагаа албан ёсоор нээлээ. Тэрээр “Эвтэй Монгол Ээлтэй төр” уриа дэвшүүлжээ. Нээлтийн арга хэмжээг УИХ-ын гишүүн Н.Учрал, МҮОНРТ-ийн сэтгүүлч, нэвтрүүлэгч Ч.Ичинхорлоо нар хөтлөн явууллаа. Хурлыг нээж МАН-ын Ерөнхий нарийн бичгийн дарга Д.Амарбаясгалан үг хэлсэн юм. Тэрээр "Сайн байцгаана уу. Та бүгдийн амар амгаланг эрье. Өнөөдрөөс 20 хоногийн дараа ямар чухал үйл явдал болохыг та бүгд мэдэж байгаа. Энэ өдөр Монгол түмний их сонголтын, хариуцлагын өдөр байх болно. Зургаадугаар сарын 26-нд бид Монгол төрийн бодлого бодлого тогтвортой байх уу, Монгол түмэн эвлэлдэн нэгдэх үү, хагаралдан бутрах уу гэдгийг сонгох өдөр. Эдийн засгаа эрчимжүүлэх үү, эдгээх үү гэдгээ шийдэх юм. Та бид гадаад нэр төрөө сэргээж, алдагдсан боломжоо эргүүлэн авах өдөр байх болно. 

  Өнгөрсөн дөрвөн жилийн хямарлын ам цаашилж, өсөлт тогтворжилий үүд наашилж байна. Хагарал биш нягтрал эвдрэлцэл биш, эв нэгдэл гэсэн тов тодорхой даалгаварыг МАН-д ард түмэн өгсөн. Ард олон ачааны хүндийг Ардын намд итгэж даатгасаар  өнөөдрийн хүртэл ирсэн. Энэ их итгэл найдварыг бүрэн дааж манлайлан ажиллах төрийн тэргүүн бидэнд хэрэгтэй байна. Ард түмний хүлээж байгаа бүтэн багийн удирдагч, бүрэн итгэлийн илэрхийлэл нь манай намын нэр дэвшигч юм. Монгол Улсын гурван сая нэг зуун мянган иргэний 2.1 сая сонгогчийн итгэл захиасыг тээн МАН-ын дарга М.Энхболд Монгол төрийн тэргүүний сунгаанд тоосоо өргөж байна. М.Энхболд дарга бол Монголын төрд тасралтгүй зүтгэсэн бэлтгэгдсэн нэр дэвшигч юм. Манай нэр дэвшигч магнайдаа тоосгүй хурдалж, торгон жолоогоо өргөүүлэх болно гэдгийг намын штабын менежерийн хувьд илэрхийлж байна. Монгол Улсын ерөнхийлөгчийн сонгуульд МАН-аас нэр дэвшигч М.Энхболд нь үндэсний эв нэгдлийн илэрхийлэгч байна гэдэгт итгэж байгааг минь хүлээн авна уу. Эвтэй Монгол ялж ээлтэй төрөө хамтдаа байгуулья. МАН-аас нэр дэвшигчийн сурталчилгааны ажил нээгдсэнийг мэдэгдэе" гэв.

Түүний дараагаар МАН-аас нэр дэвшигч М.Энхболд үг хэллээ.

 Нэр дэвшигч М.Энхболд, “Монгол Улсын төрийн тэргүүнийг сонгох сонгуулийн гарааны зурхай дээрээс элэг нэгт Монгол түмнийхээ амар мэндийг айлтган мэндчилж сайн сайхан ерөөлийг өргөн барья. Та бүхнийхээ итгэлийг тээн улс орноо хямралаас гаргах даалгаврыг өвөрлөн энэ сонгуульд би нэр дэвшиж байна. Ялалтын төлөө, улс түмнийхээ төлөө хичээн зүтгэхээ андгайлж байна. Монгол Улс бол угтаа нэг л айл гэр юм. Гэр дотроо хэрүүл тэмцэлтэй айл өөдөлдөггүй. Хагацаж сарнихыг, хагарч эвдрэхийг би тэвчдэггүй. Бүтэн гэр бүл бол бүрэн төрийн тулгуур билээ. Дүүрэн жаргалтай өрх гэр, улс орныг товхинуулахын төлөө би Ерөнхийлөгчийн сонгуульд нэр дэвшиж байна. Бидний хүсэн мөрөөддөг сайн сайханд хүргэх шандаст хүлэг бол Үндэсний эв нэгдэл юм. Нэг зорилготой, нэгдмэл үзэл бодолтой УИХ, ЗГ, Ерөнхийлөгч зайлшгүй шаардлагатай болсон гэдгийг олон түмэнд бидэнд хэлж, ярьж байна. 

Эвийг эрхэмлэх нь миний эрхэмлэдэг алтан зарчим билээ. Би олон намн төлөөлөлтэй Үндэсний эв нэгдлийн Засгий газрыг байгуулан удирдаж байсан. Сүүлийн жилүүдэд бүх намыг оролцуулсан зөвшилцөл бий болгохын төлөө ажиллаж байна. Тиймээс би улс орны эвдрүүлэн талцуулагч биш эвээр нэгтгэгч ерөнхийлөгч байж чадна. Эх орны баялаг иргэн бүрийн өмч тул түүнээс олох орлого ашгийг Монголчууд бүгдээрээ хүртэх хэрэгтэй. Миний аав бүтээн босгох хүн л энэ улсад хэрэгтэй гэж ярьж хэлдэг байсан. Тэр ч утгаараа баялаг бүтээгчдийг бид дэмжих ёстой гэдэг. Өнгөрсөн 2016 оны сонгуулийн амжилт бол хямралыг ялаарай гэж Монголын ард түмнээс бидэнд өгсөн үүрэг даалгавар юм. Удахгүй бид хямралаас гарна. Улмаар дахин дахин хямрахгүй байх дархлааг бүрдүүлэх болно. Ингэснээр иргэн нь баян, эрүүл саруул, эрдэм боловсролтой, айх аюулгүй Монгол бий болно. Ард түмэн шударга ёс, хариуцлагыг нэхэж байна. Албан тушаалын ялгаваргүйгээр хууль, хариуцлага хүлээдэг, иргэн бүр тэгш байдаг төрийг бий болгохын төлөө зүтгэнэ. Ард түмэн хүчтэй Ерөнхийлөгчийг хүсэж байгааг мэдэрч байна.  Хотыг удирдсан он жилүүдийн минь мөрөөр нурсан балгас, овоолсон шороо үлдээгүй. Бүтээн байгуулалт, хөгжлийн үндэс суурь тавигдсан. Хот хэмээх их айлын зовлон жаргалыг мэддэг хүний хувьд улсын нийслэлээ хөгжүүлэх бодлогыг тууштай хэрэгжүүлнэ. 

   Эх орныхоо хаана нь ч иргэн бүрийг сайхан амьдруулахыг зорьж ажиллана. Нэг улсын дотор хотынхон, хөдөөгийнхөн гэж хоёр хуваагдаж болохгүй. Хоёр хөрш болон дэлхийн улс түмэнтэй эрх тэгш, найрсаг харилцааг улам хөгжүүлэхийн төлөө зүтгэх болно. Би гацаах зогсоохыг биш гарц шийдлийг олдог, Монголын эрх ашгийг эн тэргүүнд тавьдаг Ерөнхийлөгч байна. Монгол Улсын тусгаар тогтнол аюулгүй байдлын манаач нь болохоор би Ерөнхийлөгчид нэр дэвшиж байна. Төр тогтвортой бол төгрөг ч бас тогтвортой. Төгрөг тогтвортой байвал түмний амьдрал сайжирдаг. Миний өрсөлдөгч бол хямрал, хагарал хоёр юм. Хэлэхээс илүү хийх нь, хямарсныг давах нь өнөөдөр хамгийн чухал байна. 

Эвтэй Монгол Ээлтэй төрийн төлөө эвлэж хамтдаа зүтгэцгээе. Баярлалаа та бүхэн дээ” гэлээ. Сурталчилгааны нээлтэд Монгол Улсын ерөнхийлөгч асан Н.Багабанди, Батлан хамгаалахын сайд Б.Бат-Эрдэнэ, Монгол Улсын гавьяат тамирчин Э.Бадар-Ууган нар дэмжиж үг хэлсэн юм.    

  Т.Амараа

ZINDAA.MN