Ж.Батсуурийг огцруулсан шалтгаан Богдын музейн сан хөмрөгтэй холбоотой юу

   Боловсрол, соёл, шинжлэх ухаан, спортын сайд Ж.Батсуурийг огцруулах Ерөнхий сайдын саналыг МАН-ын удирдах зөвлөл баталж, УИХ-ын чуулганы хуралдаанаар огцруулсан. Ерөнхий сайд Ж.Эрдэнэбат “Ж.Батсуурь нь ажиллах хугацаандаа эрхлэх асуудлын хүрээний салбарыг нэгдсэн удирдлагаар хангах, төрийн бодлого боловсруулах, хууль тогтоомжийг хэрэгжүүлэх үүргээ хангалтгүй биелүүлж, албан үүрэгтээ хариуцлагагүй хандсан” гэх битүү, хатуу үндэслэл танилцуулсан. Сайдыг ажлын хариуцлага алдсан гэдэгт Ерөнхий боловсролын сургуулийн төгсөгчдийн улсын шалгалтын материал задарсан, Хөгжлийн бэрхшээлтэй хүүхдүүдийн тусгай дунд 29 дүгээр сургуулийн асуудалд анхаарал хандуулаагүй, улмаар энэ асуудал олон нийтийн шүүмжлэлд ихээхэн өртсөн гэх үндэслэл багтаж буй. Мөн дэд сайд Ё.Отгонбаяртайгаа ойлголцож ажиллаж чаддаггүй, салбар яамаа бодлогоор хангаж ажиллахгүй байна гэдэг үндэслэл багтсан. Гэвч үнэхээр эдгээр үндэслэлүүд нь түүнийг огцруулах болсон гэхэд эргэлцэх хүн олон бий.

  УИХ-ын гишүүн С.Чинзориг чуулганы хуралдаанаар түүнийг огцруулахаар хэлэлцэх үеэр  “Хариуцлага тооцож байгаа асуудал нь эзнээ олсон уу гэж асуумаар байна. Төрийн тогоонд ажиллаж байгаа туршлагатай, ганц боловсон хүчиндээ хариуцлага тооцох асуудал яригдаж байгааг гайхаж байна. 29 дүгээр сургуулийн асуудал бол Нийслэлийн харьяанд байдаг асуудал. Нийслэлийн удирдлагуудтай хариуцлага тооцоогүй байж, шууд боловсролын сайдтай хариуцлага тооцож байгаа нь зөв үү. Үндэслэлүүд нь хууль тогтоомжид нийцэж байгаа юм уу. Зөвхөн сайдад нь хариуцлага тооцох биш. Газрын дарга, төрийн нарийн бичгийн дарга нарт нь хариуцлага тооцох юм уу” гэсэн байр суурийг хэлж байлаа. Үнэхээр л Тусгай дунд 29 дүгээр сургуулийн удирдлагыг Нийслэлийн Засаг дарга томилдог, бодлого удирдлагаар ханган ажилладаг. Энэ үүднээс нь харвал Нийслэлийн Засаг даргатай хариуцлага тооцох учиртай. Гэвч Ж.Батсуурийг сайдын суудлаас огцруулах өөр ямар шалтгаан байв гэдэг нь нууц хэвээр буй.

  Албан бус эх сурвалжийн мэдээллээр Богдын музейн сан хөмрөгтэй холбоотойгоор Ж.Батсуурь хэл аманд өртсөн гэх мэдээлэл байна. Богд хааны ордон музейд 200 гаруй амьтны чихмэл байдаг. Анх 1901 онд Монголд байдаггүй амьтдын чихмэлийг Германы Гамбург хотод захиалан хийлгэж байсан аж. Музейд 115 жил хадгалагдсан эдгээр үзмэр зарим нь устаж үгүй болоход хүрсэн тул Боловсрол, соёл, шинжлэх ухаан, спортын яам, Богд хааны ордон музей, ХБНГУ-ын Гёрлиц хотын Зенкенберг байгалийн түүхийн музей хамтран эдгээр цуглуулгаас шувуудын чихмэлийг сонгон сэргээн засварлах болсон байдаг. Ж.Батсуурь сайд томилогдож ирснийхээ дараахан 2016 оны долдугаар сарын 29-нд Германтай хамтран ажиллах санамж бичиг зурах ёслолд оролцож байжээ. Санамж бичигт Богд хааны ордон музейн захирал О.Мэндсайхан, Зенкенбергийн байгалийн түүхийн музейн амьтан судлалын тэнхимийн эрхлэгч Херман Анзорге гарын үсэг зурж, Ж.Батсуурь сайд ХБНГУ-аас Монгол Улсад суугаа Онц бөгөөд бүрэн эрхт Элчин сайд ноён Стефан Дуппел нар байлцсан байна. Эдгээр үзмэр нь VIII Богд Жавзандамбын хувийн цуглуулга юм.

    Тус музейн сан хөмрөгүүдийг засварлахаар авч явсан гэх ч тийм шаардлага байгаагүй гэж мэргэжлийн судлаач үзэж байна. “Зарим үзмэрүүдийг засварлах шаардлагагүй байсан. Германд манай үзмэрүүдийг өөр зориулалтаар аваачсан байх магадлалтай. Үзмэрүүдийг мөнгө олох зориулалтаар гаргасан байж болзошгүй” гэж эх сурвалж мэдээлж байна. Өөр нэгэн эх сурвалж болох ШУА-ийн Хэл зохиолын хүрээлэнгийн Төвд судлалын тасгийн эрхлэгч Г.Ням-Очир “Зураач Б.Шаравын (марзан) “Монголын нэг өдөр” зэрэг зургуудыг хамт гаргасан бололтой. Эдгээр бүтээлүүдийг ямар зориулалтаар гаргасан нь тодорхойгүй байгаа юм” гэжээ. Үзмэрүүдээс салбар яамны удирдлагууд хөрөнгө мөнгө хувьдаа босгосон байх магадлалтай гэж соёлын өвийг хамгаалагчид үзэж байна. Энэ асуудал МАН-ын удирдлагуудын чихэнд хүрсэнтэй холбоотойгоор Ж.Батсуурийг огцруулах үндэслэл дээр “гал нэмсэн” гэж эх сурвалж мэдээлж байна.

Т.Амараа

Эх сурвалж: WWW.ZINDAA.MN