Намбарын хүү Ерөнхийлөгчийн сонгуульд ЗЭХЭЖ явна уу, эсвэл ЦӨХӨРЧ явна уу

Цагтаа мандан бадарч цагаан захтны тэргүүн эгнээнд явж байсан онцгой хүн бол яах аргагүй Н. Энхбаяр.  Улстөрд түүний  мандан явсан он жилүүдийг хэн хүнгүй мэднэ.  Гэвч Намбарын хүү нэг л өдөр хэт өндрөөс газарт унаж ажил амьдрал, эрүүл мэнд нь оронгоороо эргэсэн он жилүүдтэй золгосон гэж хэлж болно.

Тэрээр 2016 оны  УИХ-ын сонгуульд “ял шийтгэлтэй” гэх шалтгаанаар нэр дэвших боломжоосоо мултарч гурван хоног намын нөхдийн хамт  өлсгөлөн тэмцэл зарлаад ч тусыг эс олж эцэс сүүлд нь  эхнэрээ хүртэл сонгуульд сойж үзсэн. Энэ мэт байдлаар улс төр дахь орон зайгаа олж авахыг дэндүү хүссэн нэгэн. Н.Энхбаярыг тойрсон аар, саар мэдээ үргэлжид гарч байдаг хойно  хамгийн сүүлийн мэдээлэл гэхэд  "Намын даргаас нь түүнийг буулгана" гэх яриа  хэвлэлээр гарсан нь түүний талаарх мэдээлэл үүгээр дуусгавар болов. 

Үнэхээр тэр таг чиг байгаа нь намаасаа холдов уу гэх сэрдлэгийг төрүүлэв. Тиймээс МАХН-ыг тойрсон зарим асуудлаар УИХ-ын гишүүн асан З.Баянсэлэнгээс тодруулахад тэрээр "Намын даргын хувьд хэд хэдэн лекц, илтгэлүүдийг  их сургуулиудад тавьсан, таг чиг болсон зүйл алгаа. Бидний өдөр тутмын үйл ажиллагаа хэвийн явж л байна. Намын даргыг солих тухай асуудал өнөөдрийг хүртэл яригдаагүй, өөрчлөх цаг үе ирсэн гэж бид үзэхгүй байгаа. Намын дарга сольсноор шинэчлэл явахгүй, нам өөрөө зөв бодлоготой, зөв удирдлагатай явсан цагт хэзээд ялалтад хүрнэ. Ямар үед намын даргыг солих асуудал яригдах вэ гэхээр сонгуульд амжилтгүй оролцох, нам доторх фракц, бүлэглэлийн зөрчилдөөн, эсвэл тухайн намыг удирдан авч явах боломжгүй  болсон , гол нь гишүүд өөрсдөө хүсэх зэрэг маш   олон хүчин зүйлс нөлөөлдөг. УИХ-ын сонгуулийн ялагдал биднээс, болоод намын удирдлагаас шалтгаалаагүй. Хуулийн луйвар, царцааны нүүдэл, худал амлалт, мөнгө тараалт энэ бүхнээс болсон. Мэдээж хар машин, 60 тэрбум. Дээр нь албан тушаалын наймаа буюу урвалтууд нөлөөлсөн" гэв.

Тус намын  Их хурал дахь ганц төлөөлөл болох О.Баасанхүү  намын төлөөллийн  үүргээ маш сайн гүйцэтгэж байгаа хэмээн олон нийт үзэж буй. Хэлэлцэж буй хуулийн төсөл бүр дээр  санал бодлоо хэлж байдаг тэрээр  Ерөнхийлөгчийн сонгуулийн тухай  хуулийг  шударга бус сонгууль явуулахад учир дутагдалтай гэж хэдэнтээ хэлж эцэстээ хуулийн төсөл төрхөмдөө буцсан.  Ийн таалагдахгүй байсан Ерөнхийлөгчийн  сонгуулийн тухай  хууль  нь буцаагдсан тул  МАХН Ерөнхийлөгчийн сонгуульд зэхэж эхэлсэн болов уу. Энэ тухай  мөн З.Баянсэлэнгээс асуухад "Манай намын хувьд аливаа сонгуульд оролцоход ээдрээ төвөгтэй, саад бэрхшээлтэй тулгардаг. Тухайлбал, нэр дэвшүүлсэн хүнийг маань сонгуулийн жагсаалтаас хасах, аль болох сонгуульд оролцуулахгүй байх  бүхий л арга хэрэгслийг хэрэглэдэг. Хамгийн том арга хэрэгсэл нь мэдээж хууль хүчний байгууллагаар далайлгадаг явдал юм.  Үүнийгээ ашиглаж өнгөрсөн сонгуульд манай намын даргыг нэр дэвшүүлээгүй.Энэ удаад ч ашиглах биз. Бид Ерөнхийлөгчийн сонгуульд оролцох эсэх нь маш эргэлзээтэй байгаа. Одоогоор нэр дэвшүүлэх хүнээ тодруулсан зүйл алга" гэсэн юм.  

Харин УИХ-ын гишүүн О.Баасанхүү энэ тухайд “Би МАХН заавал хүн дэвшүүлэх ёстой” гэдэг хатуу байр суурьтай байгаа. Ард түмэн манай намыг суудалтай болгож өгсөн болохоор тэдний өмнө хариуцлагаа ухамсарлах ёстой. Харин ямар ч алхам хийхгүй бол улс төрийн нам гэдэг байр сууриа алдаж байгаа хэрэг. Биднийг суудалтай болгож өгчхөөд байхад энэ боломжоо ашиглахгүй гэвэл би улс төрийн өөр сонголт хийхэд хүрнэ” хэмээн тэрээр хэвлэлд өгсөн нэгэн ярилцлагадаа хэлсэн байдаг.

Үүнээс харахад МАХН одоогоор Ерөнхийлөгчийн сонгуульд орох эсэхээ шийдээгүй байгаа бололтой. Намын дарга нь таг чиг, намын нөхөд нь эсрэг тэсрэг байр суурьтай байгаа нь энэ бүхнийг илтгэх болов уу.

Б.Алтжин