ЦАГДАА НАРЫГ ЦАГДМААР БАЙНА

-          Манай энэ нэг хүүхэд эрдэм ном сурах шинжгүй толгой муутай юм аа лам болгохоос.

-          Ээ харла аа тийм үү. Манай нөгөө дэлчгэр шар хүү хичээл номондоо их муу юм аа, бие нь өсөөд ирсэн чинь бор дарс сонирхоод, буруу зөрүү улстай нийлээд хэрэг төвөг үүсгээд хавийн амьтны өмнө ичээгээд байхын тэрнийг цагдаа болгохоос...

Курсын цагдаа бэлтгэж эхэлсэн цагаас Монголын цагдаагийн байгууллагын нэр хүнд унаж эхэлсэн. Төрийн хууль сахиулна бүү хэл хувийн соёлоо олоогүй залуусыг цахилгаан курст элсүүлэн авч цагдаа гээчийг үйлдвэрлэж эхлэв ээ. Хүмүүжил соёлын асуудалтай гэгдээд хүн амьтны өмнө эжий аавыгаа ичээдэг байсан нөхдүүд амархан ажилтай болж төрд үйлчилж эхэлсэн нь мэдээж дэвшил. Гэвч юу хатсан ч өмхийгөө тавихгүй гэдэг билээ дээ. Боловсроогүй, сураагүй, болоогүй, бодоо ч үгүй Дэлгэрийн дэлчгэр шар хууль сахиулагч болсон ч хуучин зан нь хэвээрээ л болохоор, хуулиа өөрөө хүндлэх хүний ухамсарт суралцаагүй болохоор мөн чанарыг нь түр зуур халхалсан мөрдөсний үнэ цэнэ унаж эхэлсэн юм. Машинд мотоциклийн мотор тавихтай ижил. Бүр зарим нь зүрх зориг муутай тамир тэнхээ тааруу тойрсон бүхэн нь дээрэлхдэг хүүхдийг цагдаа болгоцон гэх. Өнөөх нь гэнэт гав гинж зүүгээд гангараад ирэхээрээ эсрэгээрээ мотоцикилд машины мотор тавьсантай ижил. Цахилгаан курсын цагдаа нарыг явцад нь бас нэгэн цахилгаан курсэд хамруулсан болоод зэрэг тушаал дэвшүүлээд. Өнөөдөр иргэнийхээ аюулгүй байдлыг хамгаалах төрийн цагдаа иргэнээ архи ууснаар нь далим болгож хэвтэрт ортол нь зодож байна. Өнөөдөр төрийн цагдаа ажлаа хийж явахдаа иргэнээ лизингийн амбаар унасан өрний тулам... гэж доромжилж байна. Өнгө зүс гандуухан нэгнийгээ нийгмийн хог мэт илүүрхэж, өрөвдөх сэтгэлгүйн тугийг намируулж байна. Өөрөөсөө айхгүй төрийн цагдаа л согтуугаар машин унацан салхи татуулан зугаалж байна. Өнөөдөр Монголын цагдаа л хамгийн муу нэртэй байна. Бүгдийнх нь араншин тийм биш ч гэсэн бүхнийг хамарсан нэр хүнд нь ижилхэн болчихоор Монголын цагдаа нар гэж ярьсаар байна. Саяхан ажил үүргээд гүйцэтгэж яваад гэмт этгээдүүдийн гарт алтан сайхан амиа алдсан нэгэн залуугийн золгүй явдалаар далимдуулж цагдаа нарт буу зэвсэгийн хангамж, өөрийгөө хамгаалж галт зэвсэг ашиглах эрхийг нь өгмөөр байна гээд нэлээн шоудлаа. Өөрийг чинь хороож мэдэх сэжиг бүхий этгээдийг буудаад байгаарай гэчихвэл буун дуу тасрахгүй юм болно биз.  Үүний оронд цахилгаан курсын төгсөгчдийн толгойг цэнэглэмээр байна. Гадны жуулчдад зориулж эргүүлийн цагдаа нарт Англи хэлний сургалт явуулна гэнэ үү. Тэгвэл бас өөрсдийн иргэдээ хүндлэх сэтгэлийг өр зүрхэнд нь шингээмээр байна. Ухааны хүүдий нь хоосон ч ухамсарын түвшинг нь өсгөмөөр байна. Цагдаагийн нэр төрийг гутаадаг үйлдлүүдийг нь зогсоомоор байна. Ер нь цагдаа нарыг цагдмаар байна. Тэдний нийгмийн асуудал, цалин тэтгэмжийн хуулийг шинэчилмээр байна. Монголын цагдаагийн албанд мэдлэгтэй, боловсролтой, мөнгөтэй айлын өнгөтэй хүүхдүүд дурладаг болох цаг үеийг эхлүүлмээр байна.

Болдын ДАВАА

2013 оны 5-р сарын 26