Шалдан биеийн тэнгэрлэг сайхныг алдаршуулъя

Билэг танхай найрагч Р.Чойномын “Нүцгэн биеийг алдаршуулъя“ гэдэг сайхан шүлэг бий.
...Нүгэл хэмээн маяглаж нүдээн таглахгүйгээр
Нүцгэн биеийг алдаршуулъя
Шалиг завхай, шунал тачаалыг цааш нь түлхэж
Шалдан биеийн тэнгэрлэг сайхныг алдаршуулъя
Янаг минь чи хувцсаа тайл
Ялгаа байхгүй өмдөө ч бас тайл
Ядам хуруун дахь бөгжөө ч бүү үлдээ... хэмээн үргэлжилнэ.

1990 онд “Бүлээн нурам” кино анх дэлгэцнээ гарч эхлэхтэй зэрэгцэн эротик гэх үг монголчуудад танил болж эхэлсэн. Сиймгэр хувцасны цаанаас нэвт гэрэлтэх бүсгүйн бие, эцэгтэйгээ энгэр зөрүүлж буй Эсү бүсгүйн нүцгэн биеийг нүд дальдчин харж чаддаггүй байсан цаг саяхан.

Бүр тоочвол галав юүлж Агчин өвгөн Эсү, Мэсү хэмээх хоёр охинтойгоо ертөнцөд үлддэг. Хүний мөрөөсөл болж, үр удмаа хорвоод үлдээх гэж амь тэмцэн шаналах Агчин арга барагдан бага охин Эсүгээ хүчинддэг. Тухайн үед, киноны энэ хэсэг “муухай” гэдэг дүгнэлтийг авч байсан ч домгоос сэдэвлэсэн энэ кино  нь 1992 онд Сөүлд болсон Ази, Номхон далайн орнуудын кино наадмаас шилдэг найруулагчийн шагнал хүртсэн төдийгүй өдгөө нүцгэн биеийг алдаршуулан мөнхөлсөн хамгийн анхны кино болж байгаа юм.

Жүжигчин О.Энхтуул эл кинонд тоглосноороо залуу халуун насныхаа гоо үзэсгэлэн, нүцгэн биеээ дэлгэцэнд мөнхлөн алдаршуулсан түүхтэй. Түүний дараа “Хоёр өдөр, гурван шөнө” хэмээх эротик кинонд дүр бүтээсэн жүжигчин Р.Анхням кино урлаг төдийгүй нийгмийг тэр чигээр нь доргиосон юм. Түүний нүцгэлэлт нь амжилт, алдар нэрийг дагуулж Р.Анхням гэх бүсгүйг танихгүй хүн үгүй болов. Гэтэл тун удалгүй “Сексийн эрх чөлөө”, “Надтай гэрлээч” зэрэг кинонд дахиад л хагас нүцгэн байдлаар тоглосон нь нийгмийг тэр чигт нь шуугиулж нүцгэн биеийг алдаршуулсан анхдагчдын нэг болж чадсан юм.

Түүнтэй зэрэгцэн поп дива Т.Ариунаа тайзан дээр дотоожтой гарч дуулсан нь тухайн үед “Секс симбол” нэрийг аваад байсан О.Энхтуулын шилийг даран “Эрос” хатагтай гэх нэрийг авч байв.

Гэтэл тэдний эл амжилтыг эвдсэн бас нэгэн нүгэн бүсгүй гарч ирсэн нь “Мөнхийн залуу” топ модель Э.Одгэрэл.  Час улаан өнгийн сарнайн баглааг урдаа тэвэрсэн нүцгэн зураг нь шар хэвлэлүүдийн “Хадаас” материал болж байлаа. Хүн бүхэн түүний энрий ялдам, гоо үзэсгэлэнтэйг нь магтан дуулж топ бүсгүйг нүцгэлэлтээ амжилттай “даван туулав”.

Тун удалгүй түүний хунгийн далавч зүүсэн хагас нүцгэн зураг дахин шуугиан дэгдээж эхэлсэн юм. Ингээд л монголын тайчигч бүсгүйчүүдийн цуваа эхэлж сүүлдээ жирэмсэн тайчигч ч олширч байна.

Гэхдээ Р.Чойном найрагчийн бичсэнчлэн “...Нүцгэн бие нүглээ нуудаггүй юм,
Нүцгэн биенээс нүцгэн бие тасарна, Нүгэлтэй юм энүүнд чинь хаа байна аа...”. Үнэхээр нжцгэн биед буруу ч байхгүй, нүгэл ч байхгүй. Сайхны өмнө харц буруугүй гэдэг юм хойно саваагүй нэг нь хараад л өнгөрнө биз. Цэвэр ичимтгий монгол зангаа гээлээ гэж хэн нэгэн нь гоочилно биз. Гэхдээ нүцгэн бие бүү хэл “нүгэл” гэгчийн “хаалгыг” хүртэл магтан дуулсан байдаг юм шүү.

“...Уудам хорвоотой учран золгохноо
Уйлан хайлан тэмүүлэн гарсан
Хамгийн анхны хаалгыг алдаршуулъя
Хүн болгон энэ л хаалгаар дуу алдан цуварч
Хүж дэлхийтэй анх удаагаа тэндэлдэг
Эр болгон энэ хаалгаар дуу алдуулан зүтгэж
Эм хүнийг анх хорвоогийн яруу сайханд хүргэдэг
Хүн бүхний мах цусанд шингэсэн
Хүндтэй ариун энэ хаалгыг алдаршуулъя” гэж. Тэгэхээр ямар ч байсан шалдан биеийн тэнгэрлэг сайхныг алдаршуулъя.