Д.Ганцэцэг: “Гэгээн Муза” авч чадахгүй бол урлагаа орхиё гэж бодсон

УДЭТ-ын сайхан хүүхнүүдийн нэг гэгддэг жүжигчин Д.Ганцэцэг энэ жилийн “Гэгээн Муза” наадмаас “Шилдэг эмэгтэй дүр”-ийн шагнал гардсан. Хоёр хүүгээ өөртэйгээ адилхан хувцаслан улаан хивсний ёслолд толгой гэдгэр алхсан тэрбээр амьдралын хүндхэн шалгуурт сөхрөөгүй бардам эмэгтэй. Ажил амьдралаа цэгцлэн ид жаргах насан дээрээ хайртай аав, амраг ханиа алдсан жүжигчин бүсгүй хэсэг хугацаанд тайзнаа гараагүй гэдэг. “Амьдралын минь түшиг тулгуур болсон хоёр хайртай эр хүнээ алдах тэр агшинд би тайзан дээр байсан” хэмээн дурсдаг Д.Ганцэцэг одоо хоёр хүүгийнхээ төлөө бүсээ чангалан амьдарч буйгаа нуугаагүй.

Ихэвчлэн эсрэг дүр бүтээж явсан түүнд уран бүтээлээрээ нэрийн хуудас хийж, олонд танигдах амар байгаагүй нь мэдээж. Гэвч амьдралын хүнд хэцүү шалгуурыг давах мөчид урлагаа орхиж, зөвхөн хоёр хүүтэйгээ цагийг өнгөрөөх бодолтой явсан ч театрын хамт олон нь тусалж дэмжсэний хүчинд эргэж иржээ. Харин энэ удаагийн “Гэгээн Муза” наадамд “Бурханд илгээх захидал” жүжгээрээ нэр дэвшсэн жүжигчин бүсгүй нууцхан бодол тээн ирсэн аж. Энэ тухайгаа ч дараа нь задалсан бөгөөд “Хэрвээ би энэ наадмаас шагнал авч чадахгүй бол урлагаа орхиж, энгийн амьдрал хөөе гэж бодож байлаа. Харин одоо эргэлт буцалтгүй шийдсэн. Хүүхдүүд минь ч дэмжиж байгаа” гэж ярьжээ.

С.Цахиур