Оюутан, сурагчид гал тавьсан байж болзошгүй гэв

Баянзүрх дүүргийн XI хороо Богдхан уулын Хүрхрээгийн ам гэдэг газарт 15 га орчим талбай хамарсан ой хээрийн түймэр ассан хэрэг гарсан билээ. Түймрийг өчигдөр Нийслэлийн Аврах гал унтраах анги, Сүхбаатар, Баянзүрх, Чингэлтэй, Хан-Уул дүүргийн Онцгой байдлын хэлтсийн алба хаагчид, дархан цаазат Богдхан уулын хамгаалалтын захиргаа, “Скай ресорт” цанын баазын ажилчид гээд 110 гаруй хүн ажиллаж унтраасан байна. 

Харин тэр хавийн иргэдийн ярьж буйгаар тус газраар 60 гаруй оюутан сурагчид зугаалгаар  ирээд явсан аж. Тэд гал гаргасан байхыг үгүйсгэхгүй ч одоогоор галын нөхцөл шалтгааныг тодруулахаар харьяа дүүргийн цагдаагийн хэлтэс шалгаж байгаа аж. Тиймээс оюутан, сурагчдын хонхны баяр, сургууль төгсөлт болж байгаа тул эцэг эх, багш сурган хүмүүжүүлэгч нар хяналт тавьж нийслэлийн ногоон бүсэд аялал зугаалгаар явахыг ирэх сарын 10-ныг хүртэл хугацаанд хориглосон байна.