Британи даяар түргэн хоолны сурталчилгааг хориглолоо

Их Британи даяар 21:00 цагаас өмнө телевизийн сувгаар түргэн хоол, хийжүүлсэн ундааны сурталчилгаа нэвтрүүлэхийг хориглосон журам үйлчилж эхэллээ. Энэ хориг цахим хуудас, олон нийтийн сүлжээний хуудаснуудад ч хамаарах аж.

Энэ нь Их Британи даяар бага насны хүүхдийн таргалалт эрчимжиж, элдэв суурь өвчлөлийн шалтгаан болж байгаатай холбоотой юм байна. Британийн үндэсний эрүүл мэндийн албаны мэдээллээр 10 хүүхэд тутмын нэг нь таргалалттай, таван хүүхэд тутмын нэг нь шүд цооролтой байна.

Хэдийгээр томоохон брэндүүд үндсэн бүтээгдэхүүнээ сурталчилж болохгүй ч хүүхдийн эрүүл мэнд, насанд тохирсон өөр төрлийн бүтээгдэхүүн үйлдвэрлэх боломжтой гэж Британийн хууль тогтоогчид үзэж буй юм.