Сувилагчийн төгсөлтийн дараах сургалтын чиглэлээр “Харилцан ойлголцлын санамж бичиг” байгуулав

Эрүүл мэндийн сайдын зөвлөх Б.Дэмбэрэл, Салбарын хүний нөөцийн хөгжлийн хэлтсийн дарга Б.Туяа, Сувилахуйн тусламж, үйлчилгээний хэлтсийн дарга Б.Эрдэнэцэцэг, Эрүүл мэндийн хөгжлийн төвийн захирал М.Одгэрэл болон бусад холбогдох төлөөлөл нар АНУ-ын Rutgers их сургуулийн болон БНСУ-ын Олон улсын боловсрол солилцооны холбооны удирдах албаны бүрэлдэхүүнтэй уулзалт хийлээ.

Уулзалтаар хоёр улсын сувилагч бэлтгэх бодлого, хөтөлбөртэй танилцаж, сувилагчийн ур чадварыг нэмэгдүүлэх, төгсөлтийн дараах сургалтын хөтөлбөрийг хэрэгжүүлэх, АНУ-ын тус их сургуульд сувилагчдыг магистр, докторын хөтөлбөрт хамруулах талаар санал солилцлоо. Мөн сувилагчийн төгсөлтийн дараах сургалтын чиглэлээр хамтран ажиллахаар “Харилцан ойлголцлын санамж бичиг”-т талууд гарын үсэг зурлаа.

Энэхүү хамтын ажиллагаа нь Монгол Улсын сувилагчийн боловсролын чанарыг сайжруулах, олон улсын түвшинд өрсөлдөх чадвартай мэргэжилтэн бэлтгэхэд чухал ач холбогдолтой юм.