Хоёр хүний амь насыг хохироосон жолоочид шүүхээс 1.6 жилийн ял оноожээ

Баянзүрх дүүргийн 26 дугаар хорооны нутаг дэвсгэрт 2024.06.20-ны өдөр зам тээврийн осол гарч автомашины төмөр хийцэд хоёр хүн хавчуулагдаж харамсалтайгаар амь насаа алдсан. Тухайн үед цагдаагийн байгууллага болон онцгой байдлын газрын алба хаагчид хэргийн газарт 20 минут ажиллаж, цогцсыг гаргаж авсан байдаг.

Анхан шатны шүүх хурлаар хоёр хүнийамь нас хохирсон тус осолд шүүхээс 1.6 жилийн хорих ял оноосон байдаг. Хохирогчийн ар гэр тухайн шүүхийн шийдвэрийг эсэргүүцэж давж заалдах шатны шүүхэд хандсан байна. Түүнээс хойш өдийг хүртэл тухайн хэрэг шийдэгдээгүй байгаа юм.

Хэргийг эргэн сануулахад:

Ослын газарт Ж-гийн “Honda Insight” загварын суудлын автомашин, иргэн Б-ийн “Toyota Crown” загварын суудлын автомашинууд мөргөлдөж иргэн Ж /58 настай, эрэгтэй/, зорчигч иргэн С /42 настай, эмэгтэй/ нар автомашины төмөр хийцэд хавчуулагдаж нас барсан байсан нь тогтоогдсон. Тухайн хэрэг гараад жил гаруйн хугацаа өнгөрч байхад хэрэг 4 удаа хойшилж, ямар нэгэн шалтгаантайгаар өнөөдрийг хүртэл хэрэг нь шийдэгдээгүй байна.

Тухайн хэргийг 42 настай зорчигч, хохирогч С-ийн ар гэрээс тодруулахад:

Хорхирогчийн охин Г: Манай ээжийн осол гарснаас хойш жил гаруйн хугацаа өнгөрч байхад мөн хэрцгийгээр нас барсан байхад осол гаргасан, урсгал сөрсөн “Crown” маркийн автомашины жолооч нэг ч удаа уучлал гуйгаагүй. Мөн тухайн ослыг гаргасан жолооч хүний автомашин жолоодож явж байхдаа тухайн ослыг гаргасан. Одоог хүртэл ээжийн минь орон зай үгүйлэгдэж, өдөр хоног маш хэцүү өнгөрч байна. Дээрх осол гаргасан жолоочид маш их гомдолтой байгаагаа хэлмээр байна. Маргааш /2025.07.07/ манай ээжийн шүүх хурал дахин товлогдсон. Маргааш шүүх үнэний талд үйлчилж гэм бурууг нь хангалттай олгоно гэж би болон манай ар гэрийн зүгээс үзэж байгаа.

Энэ хэргийн талаар маргааш бид бүхэн эргэн мэдээлэх болно.