Dj Koo анх удаа албан ёсны МЭДЭГДЭЛ хийлээ

Тайванийн алдарт жүжигчин Барби Сю энэ сарын 2-ны өдөр уушгины хатгалгаа өвчний улмаас таалал төгссөн билээ. 

Түүнийг нас барсны дараа олон янзын таамаглал, мэдээлэл олноор цацагдсан бол талийгаачийн нөхөр Dj Koo өнөөдөр албан ёсоор мэдэгдэл хийлээ. 

Dj Koo "2025 оны хоёрдугаар сарын 2-ны өдөр сахиусан тэнгэр шиг тэр минь тэнгэртээ буцав. Юун түрүүнд Ши Юаний төлөө гашуудан эмгэнэж буй бүх хүмүүст гүнээ талархал илэрхийлье. Яг одоо би үгээр илэрхийлэхийн аргагүй гунигтай үеийг даван туулж байна. Маш их шаналж, дотроос минь ямар нэгэн зүйл салан унаж байгаа мэт мэдрэгдэж байна. Надад үг хэлэх хүч алга, хүсэл ч алга. 

Гэсэн хэдий ч энэ их уй гашууг ойлгож ч амжаагүй байхад зарим зүрх сэтгэлгүй хүмүүс эхнэр, гэр бүлийг минь гүтгэж эхэлсэн. Зарим нь мэдээлэл авахын тулд чоно борооноор гэдэг шиг гашуудан санаа зовж буй дүр эсгэж байхад зарим нь даатгал болон бусад санхүүгийн асуудлын талаар илт худал мэдээлэл тарааж, гэр бүлийн минь нэр хүндийг гутааж, бидний зүрх сэтгэлийг улам бүр шархлуулж байна. 

Ийм хүмүүс энэ хорвоод байдаг гэж бодох төдийд аймшигтай санагдаж байна. Та бүхнээс гуйя. Юанийг тайван амгалан байлгаад өгөөч. Үүнийг л би чин сэтгэлээсээ, цөхрөнгөө баран гуйж байна" хэмээжээ. 

Барби Сюг нас барсны дараа түүний 83 сая ам.долларын хөрөнгийг хэн өв залгамжлах бол гэх мэдээлэл гарч эхэлсэн.

Энэ тухай Dj Koo "Ши Юаний үлдээсэн өв хөрөнгийн талаар зарим зүйлсийг тодруулъя. Түүний үлдээсэн бүхэн хайртай гэр бүлээ хамгаалахын тулд шаргуу хөдөлмөр, хичээл зүтгэлээрээ олж авсан зүйлс юм. Тиймээс би хадам ээждээ өв залгамжлах эрх мэдлийг олгох бодолтой байна.  

Хүүхдүүдийн хувьцааны хувьд би тэднийг насанд хүрэх хүртэл нь хууль ёсны дагуу анхаарал тавьж, аливаа сөрөг хүмүүсээс хамгаалахын тулд өмгөөлөгчтэй хамтран ажиллах болно. 

Ши Юаньтай өнгөрүүлсэн цаг хугацаа миний хувьд үнэлж баршгүй, энэ хорвоод юугаар ч сольшгүй амьдралын минь бэлэг байсан. Түүнийхээ хайрлаж ирсэн гэр бүлийг хамгаалах нь миний эцсээ хүртэл хүлээх үүрэг гэж би боддог. Түүний хайрлаж, гашуудаж буй бүх хүнд чин сэтгэлээсээ талархаж байгаагаа илэрхийлье. Ши Юаний мөнхийн хайр Жун Жунаас..." хэмээсэн байна. 

Талийгаачийн гэр бүлийнхэн болон Dj Koo энэ сарын 5-ны өдөр Японы Ханеда нисэх буудлаас хөдөлж, тухайн өдрийнхөө 15:00 цагийн орчимд Тайванийн Тайпэй Соншан нисэх онгоцны буудалд буужээ. Түүний цогцосыг Японд чандарлан, ийнхүү эх оронд нь авчирсан байна.