Дэлхийн аваргаа шагналын мөнгөө сайдын нүүр лүү шид гэв

Сербийн Белград хотод болж байгаа сонгомол барилдаан, чөлөөт бөхийн ДАШТ дээр Казахстан улс түүхэндээ анхныхаа дэлхийн аваргыг хүлээн авсан билээ. Эрэгтэй 92 кг-ын жинд өрсөлдсөн, 19 настай Ризабек Айтмухан дэлхийн аварга болсныхоо дараа Казахстаны Үндэсний баатар болоод байна. Одоо түүний талаар мэддэггүй, ярьдаггүй казах хүн байхгүй болжээ.

Олны анхаарлыг бас нэгэн зүйл татаж байгаа нь түүхэн дэх анхны дэлхийн аваргадаа Казахстан улс ямар шагнал өгсөн бол гэдэг асуудал. Холимог тулаанч Куат Хамитов аваргадаа нэг сая ам.доллар өгөхийг холбогдох сайд нарт уриалсан талаар бид мэдээлсэн.

Ингээд удаан хүлээсний эцэст дэлхийн аварга Ризабек Айтмуханы шагналын хэмжээ тодорхой боллоо. Казахстаны Спорт, аялал жуулчлалын яамнаас “Чөлөөт бөхийн анхны дэлхийн аварга болсон, ирээдүйтэй залуу бөхөд улсаас мэдээж шагнал бий. Ризабек Айтмухан 15 мянган ам.доллар (7 сая тенге) авна. Түүний дасгалжуулагч багшид ч бас 15 мянган ам.долларын шагнал олгоно” гэж мэдэгдлээ.

Үүнийг сонссон холимог тулаанч Куат Хамитов “Ийм хөгийн зүйлийн дараа ард түмэн бид яагаад татвар төлөх ёстой юм бэ? Бидний татварын мөнгийг хаа хамаагүй үрээд, хөлбөмбөг, гадаадын  легионеруудад өгөөд бай гэж бид татвар төлөөгүй шүү. Үрж зарах болохоор манайд мөнгө байгаад байдаг, харин түүхэн гавьяатай ялалтыг үнэлэх гэхээр мөнгө байхгүй болчихдог. Энэ бүхний дараа хэн спортоор хичээллэхийг хүсэх вэ, ямар эцэг эх хүүхдээ тамирчин болгохыг хүсэх юм бэ? Ингэхээр яаж Казахстан эрүүл энх үндэстэн болж чадах юм бэ? Хэрэв би Ризабек Айтмухан байсан бол энэ 15 мянган долларыг спортын сайдын нүүр лүү шидээд хош,,,,,,,руугаа чих гэж хэлэх байлаа” гэж уурлажээ.