ШУУРХАЙ: ОХУ-ын Ерөнхийлөгч В.Путин Монголд хүрэлцэн ирлээ

Халх голын байлдааны ялалтын 80 жилийн ойг тохиолдуулан Монгол Улсын Ерөнхийлөгч Х.Баттулгын урилгаар манай улсад айлчилж буй ОХУ-ын Ерөнхийлөгч В.Путин 25 минутын өмнө (2019.09.02-ны 23:45 цаг) "Чингис хаан" олон улсын нисэх буудалд газардлаа. Түүнийг Гадаад харилцааны сайд Д.Цогтбаатар нарын албаны хүмүүс угтаж авав. 

ОХУ-ын Ерөнхийлөгч Монголд дөрөв дэх удаагаа айлчилж байгаа бөгөөд энэ удаагийн айчлалын албан ёсны арга хэмжээ маргааш /2019.09.03/ эхлэх юм.

Тухайлбал, Монгол Улсын Ерөнхийлөгч Х.Баттулга ОХУ-ын Ерөнхийлөгч В.Путиныг Д.Сүхбаатарын талбайд албан ёсоор угтаж аван, эзэн Чингис хааны хөшөөнд хүндэтгэл үзүүлж, дурсгалын зураг авахуулахын зэрэгцээ ЗХУ-ын баатар, маршал Г.К. Жуковын хөшөөнд цэцэг өргөнө.

Түүнчлэн Монгол Улсын Ерөнхийлөгч Х.Баттулга, ОХУ-ын Ерөнхийлөгч В.Путин нар Төрийн ордны ёслол хүндэтгэлийн гэр өргөөнд тусгайлсан уулзалт хийж, Монгол-Оросын харилцаа, хамтын ажиллагааны баримт бичигт гарын үсэг зурах ёслолд оролцож, улмаар нийт хэвлэл мэдээллийн төлөөлөгчдөд нээлттэй мэдээлэл хийх юм.

Энэ өдөр ОХУ-ын Ерөнхийлөгч В.Путинд Монгол Улсын Их хурлын дарга Г.Занданшатар, Ерөнхий сайд У.Хүрэлсүх нар бараалхаж, хоёр улсын хамтын ажиллагааны талаар санал солилцохоор төлөвлөжээ.

Харин айлчлалын төгсгөлд Монгол Улсын Ерөнхийлөгч Х.Баттулга ОХУ-ын Ерөнхийлөгч В.Путин нар "Их тэнгэр" цогцолборт Халх голын байлдааны ялалтын 80 жилийн ойн хүндэтгэлийн дайллагад оролцох юм байна. 

Айлчлалыг Монгол, Оросын 270 орчим сэтгүүлч, хэвлэл мэдээллийн ажилтнууд сурвалжилна. 

ШУУД ҮЗЭХ
 

Дашрамд дурдахад, Манай улсын зүгээс ОХУ-тай харилцаагаа бэхжүүлж Иж бүрэн стратегийн түншлэлийн гэрээ байгуулахад анхаарч байгаа бол ОХУ-ын хэвлэл мэдээллийн хэрэгслээр В.Путин айлчлалынхаа үеэр хамтын ажиллагааны 11 гэрээнд гарын үсэг зурна хэмээн мэдээлж байгаа юм.