Дөрвөн хүний амь аварсан дэслэгч Г.Ганбаяр шагналын гэрээ өндөр настанд бэлэглэлээ

Сонгинохайрхан дүүргийн 25 дугаар хороо Хайрханы 14-08 тоотод оршин суух иргэн Ц.Найманжингийн эзэмшлийн өвлийн сууцанд гал гарч дотор нь унтаж байсан дөрвөн иргэнийг Сонгинохайрхан дүүрэг дэх цагдаагийн II хэлтсийн эрүүгийн төлөөлөгч, цагдаагийн дэслэгч Г.Ганбаяр галын аюулаас аварсан байдаг.

Түүний гавьяат үйлсийг Монголын улаан загалмайн нийгэмлэгээс сайшаан таван ханатай гэр өгсөн. Тэгвэл Г.Ганбаяр уг гэрээ дүүргийнхээ 25 дугаар хорооны амьдралын нөхцөл тааруухан Х.Мандах гэдэг хөгшинд өгч, сэтгэлийн тусыг хүргэв.

Гэр хүлээлгэн өгөх ажил дээр Цагдаагийн II хэлтсийн дарга хурандаа А.Бакыт болон Монголын Цагдаагийн "Сүлд" чуулгын даргаар ажиллаж буй дууны зохиолын их мастер болсон Гаваасүрэн гуай, 25 дугаар хорооны Засаг дарга, ИНХ-ын дарга нар энэхүү сайхан үйлсийн гэрч болж хамт байлаа.

"Мандах хөгшнийг би сайн мэднэ. Хэдийгээр хөл муутай ч нийгмийн идэвхи маш сайтай, хорооны хамаг л хогийг цэвэрлэж явдаг сэтгэлтэй хөгшин байгаа юм. Г.Ганбаярын маань өглөг зөв хүндээ очиж байгаад үнэхээр баяртай байна. Ингээд миний зүгээс Г.Ганбаяртаа дүүргийн Иргэдийн Төлөөлөгчдийн Хурлын Хүндэт тэмдэгээр энгэрийг нь мялаалаа. Энгэрээр нь дүүрэн эрэлхэг үйлсийн нь гэрч одон медалиуд ярайж байна лээ. Үнэхээр бахархалтай сайхан үйл байлаа." хэмээн Сонгинохайрхан дүүргийн Иргэдийн Төлөөлөгчдийн Хурлын дарга Б.Мөнхцэцэг өөрийн пэйж хуудсандаа бахдан өгүүлсэн байна.

Цагдаагийн дэслэгч Г.Ганбаярын баатарлаг үйлийг цухас сануулбал, 2017 оны нэгдүгээр сарын 24-ний өглөө түүнийг ажилдаа явж байхад Сонгинохайрхан дүүргийн 25 дугаар хорооны нутаг дэвсгэрт, автобусны буудлын ойролцоо зам дагуу байрлах айлын хашаанаас утаа гарч байжээ. Дөхөж очоод хартал тус айлын байшин шатаж байсан байна. Хаалгыг нь цохиод “Гал гарч байна” хэмээн орилоход хүн гарч ирээгүй тул хашааг нь давж, уг айлын том өрөөний цонхыг хагалаад 4 хүнийг дараалан гаргажээ.

Тухайн үед үүдний өрөөнд дэгдсэн гал хүчээ авч бүх өрөөнд утаа бий болж, юу ч харагдахгүй болсон байж. Хүнд нөхцөл байдал үүссэн байсан ч дотор байгаа бүх хүнийг аварчих юмсан гэсэн бодлоор зүтгэсний үр дүнд ийнхүү дөрвөн хүний амь насыг аварсан юм.

Д.Тамир