”Хүннү Эйр”-ийн онгоцны хөдөлгүүрийн маслын даралт унаж дүүрэн хүнтэй ослын буулт хийжээ

ИНЕГ-ын Даргын түр орлон гүйцэтгэгч Т.Лхагвасүрэн сүүлийн өдрүүдэд нилээд барцад ихтэй явна. Саяхан даа, байгууллагын дарга нар маань “шилдэг агентлаг” болох гэж татвар төлөгчдийн мөнгийг хулгайгаар зарж байж тэр дундаас ИНЕГ 2-р байрт шалгарсаны үрээр одоо АТГ-т шалгагдаж байна. УИХ-ын индэр дээрээс Ерөнхий Сайд эдгээр дарга нарын асуудлыг шалгаад “илэрвэл” хатуу арга хэмжээ авахаа мэдэгдсэн. Шилдэг нэрээ шал дордуулж суугаа түр орлон гүйцэтгэгч маань хичнээн “хичээвч” энэ том байгууллагыг удирдан авч явах туршлагагүй, бодлогогүй нэгэн болтой. Өнгөрсөн баасан гаригт буюу 6 дугаар сарын 27-ны өдөр “Fly Adventure” компанийн эзэмшдэг “Bekas X32” маягийн JU9090 дугаартай хөнгөн онгоц УБ-ын районд Хүрхрээ, Баянзүрхийн ам орчимд нислэг хийх явцад 13.38-д хөөрөхдөө нисгэгч нь хүмүүсийн хэлдгээр “маш бүдүүлэг” алдаа гаргаж  /нисгэгч нь хаалгаа дутуу түгжсэнээс/, уг онгоцны далавчийг хугалан бусад эд ангийг гэмтээжээ. Нисэхийн мэргэжилтнүүдийн ярьж байгаагаар бол энэ онгоц дахин босч ирэхээсээ өнгөрчээ. Азаар хүний амь эрсдээгүй байна. ИНЕГ-ын бүртгэлтэй онгоцны жагсаалтаас энэхүү эвдэрсэн онгоц бүрмөсөн хасагдаж байна гэсэн үг. Гэтэл энэ үеэр түр орлон гүйцэтгэгч Т.Лхагвасүрэн Солонгос улсад хувийн ажлаар явж таарсан байх юм. Амралтын өдрүүд таарсан учраас энэ хэргийн талаар Зам, тээврийн Сайддаа яг юу болоод өнгөрсөн талаар хэлэлгүй “тас нуужээ”. Украйн улсад үйлдвэрлэсэн хүн тээвэрлэх болон хөдөө аж ахуйн зориулалтаар ашиглаж болох энэ онгоц Монгол улсад хоёрхон ширхэг байсны нэг нь мөн ийм замаар эвдэрсэн байна. Ингээд манай улс ийм төрлийн онгоцгүй болжээ. Илжиг модондоо хударгандаа гэдгээр байдал намжаагүй байтал хоёр ч хонолгүй дахин ноцтой асуудал гарсан байна. 6 дугаар сарын 30-ны өдөр “Хүннү Эйр” компанийн Фоккер-50 онгоц УБ-Ховд-УБ чиглэлд дүүрэн хүнтэй нислэг үйлдэж яваад замдаа хөдөлгүүрийн маслын даралт унаснаас болж хөдөлгүүрээ хянах болцоогүйгээс Завхан аймгийн нисэх буудалд маш түргэн “ослын буулт” хийж амжив. Гай болоход улсын маань төрийн түшээ гишүүн М.Зоригт уг онгоцонд сууж явж таарч. Сүхбаатараас УБ чиглэлд явж байсан Зорчигч тээврийн автобус саяхан онхолдож, олон хүний амь нас үрэгдсэн зовлонг гишүүн маань “өөрийн биеэр” үзэх шахжээ. Багтартлаа уурласан гишүүн маань Зам тээврийн Сайд А.Гансүх рүү залган, “Чи энэ нисэхийхнийгээ ажлыг нь хийлгээч” гэж уурлах гомдохын наахнуур хашгирчээ. Удалгүй гишүүнийг УБ-аас тусгай онгоц нисч ирээд аваад явсан байна. Үлдэж хоцорсон зорчигчид учрыг нь ололгүй амьд үлдсэндээ ханцуйндаа залбиран баярлан үлдэцгээсэн байна. Нисэхийнхэн үнэнийг тас нуусан ч хэвлэл, мэдээлэлийн энэ их эрчтэй хөгжлөөс харин ч нууж чадсангүй ээ. Тэд “үнэн”-ийг мэдээлэхээс айцгааж байна. Хөдөлгүүрийн маслын даралт унасныг автомашинтай адилтган зүгээр л “хянах самбар” ажиллаагүй хэмээн мэдээлэв. Иймэрхүү худал мэдээллүүдийг өнөөдрөөс хүчтэй цацах боллоо.

Их хүсээд байгаа хүнд Төрийн тамга бүү атгуул гэж өвгөд дээдэс сургадаг. Монгол улсын Ерөнхий Сайд аа, агаарын тээврийн салбарын хариуцлагагүйн уршиг хүний амиар төлж байж дуусдаг хуультай энэ салбарын тамгыг түр атгуулсан “түр орлон” гүйцэтгэгч Т.Лхагвасүрэн таны толгойг тань нэгмөр цусдах нь байна шүү гэдгийг хөдлөшгүй баримтаар сонордуулж байна.