“Мобиком”, “Петровис”, “Миний сүлжээ”-ний эзэд О.Магнайгийн эсрэг хүчээ нэгтгэв

Зүй ёсны шаардлага тавьсныхаа төлөө өөрийнхөө амь насанд халдана гэсэн сүрдүүлгэнд өртлөө гэх агуулгатай мэдэгдлийг О.Магнай дарга хийгээд байгаа. Тэгвэл О.Магнай даргын шийдвэрийг зүй ёсны бус гэж үзсэн “Мобиком”-ын ТУЗ-ийн дарга Ц.Болдбаатар, “Миний сүлжээ” дэлгүүрийн захирал Х.Ариунболд, “Петровис” компанийн удирдлагууд эв санаагаа нэгтгэн түүний эсрэг тэмцэл өрнүүлэхээр болсон гэх мэдээлэл байна.  Тэгэхээр хэрэглэгчдийн эрх ашигт харшилсан үйл ажиллагаа явуулсан компаниуд гэж тодотгож байгаад зөрчлийг нь хэлж яриад нийтэд мэдээлээд байгаа ШӨХТГ-ын дарга нь эдгээр компаниудын эсрэг авах дараагийн арга хэмжээ юу байх вэ гэдэг нь анхаарал татаж байна.

Ямартай ч ШӨХТГ-аас Мобиком компанид хяналт шалгалт хийж хэрэглэгчдээс илүү төлбөр авсан зөрчлийг илрүүлсэн талаар мэдээлсэн бол хариуд нь Мобикомын олон нийттэй харилцах хэлтсийн зүгээс  “ШӨХТГ-аас яагаад  ийм мэдээлэл гаргасныг гайхаж байна" тайлбар хийсэн. Тэгсэн ч ШӨХТГ-ын Өрсөлдөөний зохицуулалтын хэлтсийн дарга Л.Ган-Өлзий хэлэхдээ “Хэрэглэгчийн төлбөр тооцоог бодох явцад зарим хэрэглэгчийн төлбөр илүү гаргасан зөрчил илэрсэн. Манай шалгалт 9 сарын 16-н хийгдаж энэ зөрчил 10 сарын 16-нд гарсан. Үүнээс өмнө хэрэглэгчдээс  9 сарын билл илүү бодогдсон байна гэсэн гомдол ирж байсан. Үүний дагуу бид Мобиком компанид шаардлага хүргүүлж, тэд зөрчлөө хүлээн зөвшөөрлөө гэсэн албан бичгийг манайд ирүүлсэн. Энэ зөрчлийн хүрээнд Мобиком компанид 10 хүртэлх сая төгрөгийн торгууль ногдож байгаа.  Цаашид тус компанид хийх шалгалт үргэлжилнэ. Зөрчил илэрсээр байвал тус компанийн жилийн орлогын 4 хүртэлх хувиар торгож, улсын орлого болгох хуулийн заалт байгаа.” гэсэн юм.

Мөн тус газраас  “АПУ” ХК, “Номин”, “Миний сүлжээ” дэлгүүрийг торгосонтой холбоотой мэдээлэл хийхдээ О.Магнай “Миний сүлжээ” дэлгүүрийн захирал Х.Ариунболдод дарамтлуулсан гэх мэдээллийг хэвлэлийнхэнд өгсөн юм. Эдгээр компаниудыг торгох болсны учир нь тус газраас өнгөрсөн жил явуулсан шалгалтад “Миний сүлжээ” дэлгүүр болон “Номин” супермаркет бүдэрсэн тул зөрчлөө арилгах даалгавар өгсөн ч өнөөдрийг хүртэл биелүүлээгүй тул торгууль ногдуулсан гээд байгаа. “Номин”, “Миний сүлжээ” дэлгүүрүүд  нь монополь байдлаа ашиглан харилцагчдаа ялгавартай ханддаг, харилцагчдаасаа шимтгэл нэрийн дор өндөр хувь тооцож авдаг.Энэ нь бараа бүтээгдэхүүний үнийг өгсөх үндэс болдог. Мөн лангуу дээрх үнэ, кассын үнэ хоёр зөрүүтэй байдаг зэрэг зөрчил илэрсэн тул  “Миний дэлгүүр”-ийг 450 сая, “Номин холдинг” -ийг нэг тэрбум 168 сая төгрөгөөр торгох шийдвэрийг гаргасан гэж мэдэгдсэн.

Харин  “Миний сүлжээ” дэлгүүрийн захирал Х.Ариунболд үүний хариу тайлбар хийхдээ ШӨХТГ-ын шийдвэрийг хүлээн зөвшөөрөхгүй байна гэсэн. Мөн О.Магнай ална гэж сүрдүүлээгүй гэсэн. Бас “Энэ хүн зүгээр пи-ар хийгээд байгаа байхгүй юу. Урьд нь ярьж байсан зөндөө асуудал бий. Ямар ч шийдэгдсэн зүйл алга. Энэ хүн бол зүгээр юмны үзүүрээс бариад шуугиан тарьж, юм хийсэн юм шиг харагддаг хүн. Би өрөөнд нь ороод та ямар ч үндэслэлгүй, шүүхийн шийдвэр, дүрэм журам гараагүй үед ингэж зарлах буруу гэсэн. О.Магнай бол амьдрал мэдэхгүй, юу ч мэдэхгүй сенсаци хийсэн хүүхэлдэй” гэж хэлсэн байгаа.

Тэгэхээр О.Магнайгаар удирдуулсан ШӨХТГ компаниудыг хилсдүүлээд байна уу, эсвэл хууль зөрчсөн компаниуд О.Магнай нарын тавьсан торгуулийг эсэргүүцэж, нэр хүндээ цэвэрлэж авах гэсэндээ гүрийгээд байна уу гэдэг асуулт хариулт нэхэж байна.