Солонгост суралцдаг монгол оюутан баривчлагджээ

БНСУ-д суралцаж буй Монгол оюутан В-г өнгөрөгч бямба гарагт Сөүл хотын Шинчүн дүүргийн цагдаагийн газраас саатуулсан талаар mglradio мэдээллээ. Оюутан В нь архидан согтуурсны улмаас бусадтай зодолдон биед нь гэмтэл учруулсан хэргээр саатуулагджээ.

Тэрээр 8-р сарын 3-ны шөнийн 03.00 цагийн орчим тус дүүрэг дэх нэгэн бааранд найзуудтайгаа сууж байгаад зэргэлдээ ширээнд сууж байсан  Иран улсаас ирсэн оюутантай маргалдаж эхэлсэн байна.

Солонгос хэл сайн мэдэхгүй Монгол, Иран 2 оюутан хоорондоо чанга дуугаар хэрэлдэн олны анхаарал татаж байх үед Монгол оюутан түүний биед эхлээд гар хүрэн зодолдож улмаар хөмсөг хавьцаа нь 2см орчим урт сэтэлж орхисон хэрэг үйлдээд хэргийн газраас зугатаасан ажээ.

Гэвч Монгол оюутан хэтэрхий их архи уусан байсан учраас төдий л холдож чадалгүй гадаа гудамжинд газар унан унтаж байгаад цагдаагийнханд саатуулагдаад байгаа юм байна.