“Виз мэдүүлээгүй бол хураамжаа буцааж ав”

БНСУ-ын визний хураамж төлөөд виз мэдүүлээгүй 3000 гаруй монгол иргэн байдаг. Харин Монгол-Солонгосын визийн нөхцлийг хөнгөвчлөх хэлэлцээр хүчин төгөлдөр болсон өдрөөс буюу 2012 оны 10 дугаар сарын 26-наас тус улсын ЭСЯ-наас уг хураамжийг буцаан олгож эхэлсэн. Тэгвэл одоогоор хураамж төлөөд виз аваагүй нийт 3000 гаруй монгол иргэнээс  дөнгөж 220 хүн л мөнгөө буцаан аваад байгаа юм байна.

Тиймээс 2007 оны 6 дугаар сарын 7-ноос хойш тус улсын ЭСЯ-ны ХААН банкин дахь дансанд хураамж төлөөд виз мэдүүлээгүй иргэд энэ оны 6 дугаар сарын 30-ныг хүртэл шаардагдах материалаа ЭСЯ-нд бүрдүүлэн өгч, хураамжаа буцаан авах боломжтой  аж.

Бүрдүүлэх материалд хураамж төлсөн баримт, гадаад паспорт, виз мэдүүлэгчийн хадгаламжийн дэвтэрийн хуулбар зэрэг байх бөгөөд энэ тухай дэлгэрэнгүй мэдээллийг тус ЭСЯ-ны вэб хуудаснаас авч болох юм байна.