ОБЕГ | Үер, усны аюулаас сэрэмжлүүлж байна

Өнөөдөр Улаанбаатар хот, Төв, Сэлэнгэ, Дархан-Уул аймгийн нутаг болон Дундговийн хойд хэсгээр их усархаг бороо орох, салхины эрч ширүүсэх зэрэг цаг агаарын онцгой нөхцөл байдал үүсэж болзошгүйг Цаг уур, орчны шинжилгээний газраас сэрэмжлүүллээ.

Малчид, иргэд, хадланчдын анхааралд:

Наймдугаар сарын 20-ны өдөр Төв, Орхон, Сэлэнгэ, Дархан-Уул, Дундговь аймгийн нутгаар, 20-21-нд шилжих шөнө Төв аймгийн зүүн хэсэг, Дорноговь, Говьсүмбэр, Хэнтий, Дорнод, Сүхбаатар аймгуудын нутгаар усархаг бороо үргэлжлэн орох тул болзошгүй нөөлөг салхи, аянга цахилгаан, мөндөр, үер усны аюулаас сэрэмжтэй байхыг анхааруулж байна.

Баруун аймгуудын нутгаар солигдмол үүлтэй, бусад нутгаар үүлэрхэг. Баруун аймгуудын нутгийн зарим газар, төв болон говийн аймгуудын ихэнх нутаг, зүүн аймгуудын нутгийн баруун хэсгээр бороо, дуу цахилгаантай аадар бороо, мөндөр орно. Баруун аймгуудын нутгаар баруун хойноос, бусад нутгаар баруун өмнөөс секундэд 5-10 метр, нутгийн зарим газраар борооны өмнө түр зуур ширүүснэ. Нутгийн баруун хагаст сэрүүсэж, Монгол-Алтай, Хангай, Хөвсгөлийн уулархаг нутаг, Тэрэлж голын хөндийгөөр +12…+17 градус, говийн бүс нутгийн зүүн өмнөд хэсэг, Дорнод-Дарьгангын тал нутаг, Халх голын сав газраар +26...+31 градус, бусад нутгаар +17...+22 градус дулаан байна.

УЛААНБААТАР ХОТ ОРЧМООР: Үүлэрхэг. Ахиу хэмжээний бороо орно. Салхи зүүн өмнөөс секундэд 5-10 метр, борооны өмнө түр зуур ширүүснэ. +17...+19 градус дулаан байна.

БАГАНУУР ОРЧМООР: Үүлэрхэг. Бороо орно. Салхи зүүн өмнөөс секундэд 5-10 метр, борооны өмнө түр зуур ширүүснэ. +17...+19 градус дулаан байна.

ТЭРЭЛЖ ОРЧМООР: Үүлэрхэг. Бороо орно. Салхи зүүн өмнөөс секундэд 5-10 метр, борооны өмнө түр зуур ширүүснэ. +15...+17 градус дулаан байна.

Иймд хур борооны эрчимжлээс шалтгаалан гол мөрний усны түвшин богино хугацаанд огцом нэмэгдэх, сайр, гуу жалгаар уруйн үер буух аюултай тул иргэдийг
 

• Үерийн аюултай бүсээс зайдуу газар амьдрах, 
• Гол мөрөн, нуурын эрэг хөвөөнд амарч зугаалахдаа онцгойлон анхаарах,
• Уулын ам, голын эрэг, үерийн буулт бүхий газарт отоглож хоноглохгүй байх,
• Зөвхөн зөвшөөрөгдсөн зам, гүүрээр зорчихыг зөвлөж байна.

Мөн шаардлагагүй тохиолдолд аян замд гарахгүй байх, хүүхдийг хараа хяналтгүйгээр гол мөрөн, нуур, цөөрмийн орчимд тоглуулахгүй байхыг анхааруулж байна.

Гэрээс гарахдаа шүхэр, усны цуваа авч, хувцсаа тохируулан өмсөх, орон сууцны хорооллын авто зогсоол, подвал руу ус орохоос сэргийлэн хамгаалалт татах, үерийн аюулаас гэр орон, өмч хөрөнгө, ундны усны нөөц худгийг хамгаалалттай байлгахыг онцгойлон сануулж байна.