Пари Сен-Жермен - Интер: Аваргуудын лигийн шигшээ тоглолт

Европын клубуудийн хамгийн нэр хүндтэй тэмцээний эцсийн тоглолтын тоймыг хүргэж байна.

Энэхүү тоглолт тавдугаар сарын 31-нд болно. Шинэ аварга төрөх үү? Пари Сен-Жермен (ПСЖ) клуб түүхэндээ анх удаа Аваргуудын лигийн түрүүг хүртэхийг зорьж байна. Тэд өмнө нь зөвхөн нэг удаа шигшээд шалгарч байсан нь 2020 онд бөгөөд Неймар, Килиан Мбаппе нарын бүрэлдэхүүнтэй баг Байерн Мюнхенд 0:1-ээр ялагдаж байв.

Харин энэ удаа Францын аваргууд багийн тоглолт, залуу авьяастнууддаа найдаж байна. Луис Энрике Оусман Дембелег Алтан бөмбөгийн төлөө өрсөлдөх хэмжээний тоглогч болгож, мөн Дэзирэ Дуэ, Жоау Невеш нарт итгэл үзүүлж, тэд ч гайхалтай тоглолтоор хариу барьж байна. Мөн энэ жил Мюнхен хот ПСЖ-д ээлтэй байх магадлалтай. Энэ хотод зохиогдсон өмнөх дөрвөн шигшээ тоглолт бүрт шинэ аварга төрж байжээ. Түүнчлэн Луис Энрике шийдвэрлэх тоглолтуудад амжилт үзүүлж чаддаг. Түүний удирдсан багууд 12 тоглолтын 10-д нь ялалт байгуулж байсан. Сонирхолтой нь, энэ бол Франц ба Италийн багуудын хооронд явагдаж буй Аваргуудын лигийн түүхэн дэх ердөө хоёр дахь шигшээ тоглолт юм. Эхнийх нь 1993 онд болж, Марсель Миланыг хожин, түрүүлж байв. Түүнээс хойш Францын багууд энэ цомыг дахин хүртээгүй. Хагас шигшээ тоглолтын дараа Луис Энрике Барселонатай тоглохгүй болсондоо баяртай байсан. Гэвч Интер илүү хүчтэй  өрсөлдөгч байх талтай. Италичууд өрсөлдөгчийн тоглолтод амархан дасан зохицож чаддаг. Тэдний сөрөг довтолгоо маш аюултай.

Интер эргэн ирж ялалт байгууллаа

Симоне Инзагигийн баг хоёр жилийн өмнө Аваргуудын лигийн шигшээд Манчестер Ситид ялагдаж байсан ч энэ удаад өмнөх алдаагаа давтахгүйг хичээж байна. Түүхэндээ “Нерадзурри” буюу Интер энэ тэмцээний шигшээд нийт зургаан удаа тоглосноос гуравт нь түрүүлж байжээ. Интерийн хувьд Альянц Аренад хагас шигшээд Байерн Мюнхенийг 2:1-ээр буулган авч байв. Симоне Инзагигийн баг хасагдах шатанд гайхалтай тоглолт үзүүлсэн. Тэд Байерн, Барселонатай хийх тоглолтуудад гайхамшгийг бүтээж, шигшээд шалгарсан. Ялангуяа Лаутаро Мартинес онцлох тоглогч байсан. Аргентин довтлогч каталончуудын эсрэг хариу тоглолтод бэртэлтэй орсон ч гоол оруулж, торгуулийн цохилт авч чадсан. Интерийн ахлагч финалын тоглолтод оролцоно. Миланд болсон Барселонатай тоглолт зөвхөн Лаутарогийн гайхалтай тоглолтоор бус, Франческо Ачербигийн түүхээр дурсагдаж байна. 37 настай хамгаалагч УЕФА-гийн тэмцээнд анхны гоолоо оруулж, тоглолтыг нэмэлт цагт оруулсан бөгөөд тэрээр энэ гоолоо 19 жилийн өмнө анх өмсөж байсан пүүзээрээ хийсэн юм. Тэр пүүз шигшээд бас тус болох болов уу? Мөн тавдугаар сарын 31-ний тоглолт өөр ямар гайхалтай түүхийг бүтээх бол? Жишээ нь, хэрэв Интер ялбал Генрих Мхитарян Аваргуудын лиг, Европын лиг, Конференцийн лиг гурвуулаа хүртсэн анхны тоглогч болох юм. Пари Сен-Жермен ба Интер клуб урьд өмнө албан ёсны тоглолтод огт таарч байгаагүй бөгөөд хоёр баг аль аль нь өөрсдийн шинэ түүхийг бүтээхийг хүсэж байна.