МХБХ-ноос ИЧИРО ОЦУКАД хүндэтгэл үзүүллээ

Монголын Үндэсний шигшээ багийн ахлах дасгалжуулагчаар 2022 оны нэгдүгээр сараас хойш ажиллаж эхэлсэн Япон улсын мэргэжилтэн Ичиро Оцукад МХБХ-ны Ерөнхий нарийн бичгийн дарга Т.Дагвадорж хүндэтгэл үзүүлж, цаашдын замналд нь амжилт хүслээ.

Монголын Хөлбөмбөгийн Холбоо, Японы Хөлбөмбөгийн Холбоотой байгуулсан санамж бичгийн хүрээнд Үндэсний шигшээ багийн ахлах дасгалжуулагчаар уригдан ирж ажилласан түүний анхны тоглолт нь 2022 оны гуравдугаар сард Лаосын багийн эсрэг тохиож байлаа. Харин өнгөрсөн зургадугаар сард Камбожийн багийг нутагтаа 2:1 харьцаатай буулган авсан юм. 

Ноён Ичиро Оцука нь Монголын Үндэсний шигшээ багийг удирдаж, нийт 16 тоглолтод оролцохдоо хоёр хожиж, хоёр тэнцэж, 12 удаа ялагдал хүлээжээ. 

Түүнийг ажиллаж байх хугацаанд Монгол-Япон хоёр улсын хоорондын харилцаа шинэ түвшинд гарсан гэдгийг онцлох нь зүйтэй.

Дасгалжуулагч Ичиро Оцукагийн Монгол Улсын хөлбөмбөгийн спортын салбарт оруулсан хувь нэмрийг нь ямагт санан дурсах болно.