Виталий Оруджев: Парист олимпын жинд барилдах болно

Чөлөөт бөхийн түүхэнд дэлхийн аварга болсон аавынхаа амжилтыг хүү нь давтсан тохиолдол ердөө ганцхан байдаг. Энэ тохиолдол хэдхэн хоногийн өмнө Белградад боллоо. Эрэгтэй 61 кг-ын жинд түрүүлсэн АНУ-ын Виталий Оруджев аавынхаа шийрийг хатаалаа.

Түүний аав Вугар Оруджев 25 жилийн өмнө АНУ-д шилжиж, иргэншил авсан. Азербайжаны уугуул Вугар Оруджев ЗХУ, ОХУ-ын шигшээ багт 48 кг-ын жинд барилдаж, 1992 оны олимпын хүрэл медальт, 1991, 1995 оны дэлхийн аварга хүн. Одоо Америкт чөлөөт бөхийн дасгалжуулагчаар ажилладаг. Нью-Йорк мужийн Алдрын танхимд сонгогдсон шилдэг мэргэжилтэн.

Сербийн ДАШТ-д түрүүлснийхээ дараа хүү Оруджев ОХУ-ын сэтгүүлчдэд ярилцлага өгсөн байна.

-Аав хүү дэлхийн аварга чөлөөт бөхөд та хоёр л байна.

-Аав минь дэлхийн хошой аварга болохоор л би чөлөөт бөхөд орсон. Гэхдээ би түүхэнд аав хүү хоёулаа дэлхийн аварга болсон тохиолдол байдаг эсэхийг мэддэггүй байлаа. Миний аав олимпын медальтай хүн. Тэгэхээр миний зорилго бол дэлхийн хошой аварга болох, олимпын медалиар аавыгаа давж гарах явдал.

-Тийм болохоор та олимпын жин 57 кг-д шилжиж байгаа юм уу?

-Тиймээ, миний дэлхийн аваргын алтан медаль олимпын бус жингийх. Маргаашнаас би 57 кг-д шилжих бэлтгэлээ эхлүүлнэ. Ирэх жил АНУ-ын шигшээ багийн сонгон шалгаруулалтад ялахын төлөө хичээнэ.

-Таны хувьд Гилман, Ричардас хоёрын хэн нь хэцүү өрсөлдөгч вэ?

-Гилман илүү хэцүү. Гэхдээ би түүнийг нэг удаа ялж байсан.

-Тэгвэл дэлхийд хамгийн хүчтэй өрсөлдөгч тань хэн бэ?

-Хамгийн хэцүү өрсөлдөгч минь би өөрөө. Хэрэв бэлтгэл, форм хэвийн байвал намайг хэн ч ялж чадахгүй.

-Мэргэжлийн Поддубный лигт хүч сорих бодол бий юу?

-Яагаад үгүй гэж? Ирэх жилийн бэлтгэлд саад болохгүй бол урилгыг хүлээн авахад бэлэн байна. Би барилдах дуртай.

-Жирийн үед хэдэн кг байдаг вэ?

-64 кг орчим. Жин хасахад ямар ч асуудал байхгүй. Хэрэгтэй хөтөлбөр боловсруулах бүтэн баг надад бий.

-Та ОХУ-д очиж байсан уу?

-Аавын бэлтгэл хийдэг байсан Владикавказ хотод очиж байсан. Красноярскт Ярыгиний нэрэмжит тэмцээнд оролцоод эхний тойрогт ялагдаж, “энэ аймар бөхчүүдтэй яаж барилдах вэ” гэсэн шоконд орж байлаа. Ингээд илүү хүчтэй болоод дахин ирнэ дээ гэж андгайлж байлаа. ОХУ-ын бөхийн школ бол үнэхээр гайхамшигтай. Абдулрашид Садулаев бол хамгийн шилдэг нь. Орос бөхчүүд чөлөөт бөхийн хамгийн шилдэг нь тул тэдний барилдааныг үзэж, юм сурдаг. Садулаев, Сидаков, Угуев, Абасгаджи Магомедов нар ясны хүчтэй бөхчүүд. Оросын бөхийн школыг маш их хүндэлдэг.