"Дархан аваргууд” БАЯРТАЙ!

Ц.Энхтүвшин, "Таван цагариг" сонин

"Австрали-Шинэ Зеланд 2023" эмэгтэйчүүдийн хөлбөмбөгийн аварга шалгаруулах тэмцээн томоохон багуудад тун халтай болж буйг өмнө нь дурьдсан билээ. Тэгвэл энэ удаа бүүр эмэгтэй хөлбөмбөгийн хамгийн хүчирхэг баг болох АНУ-ын бүсгүйчүүд дэлхийн аварга шалгаруулах тэмцээнийг орхиж байна. Өнөөдөр болсон хоёр дахь тоглолтод АНУ-Шведийн багууд үндсэн болон нэмэлт цагт буюу 120 минутын дараа 0:0-ээр хайнцаж, ялагчийг торгуулийн цохилтоор тодруулсан юм. Тоглолтын үед Америкийн баг гоол оруулах цөөнгүй боломж гаргасан ч Шведийн хаалгач Мусович үнэхээр шилдэг тоглолтоо үзүүлж, хаалгаа цоожтэй мэт манаж чадсан.

Торгуулийн цохилтоо АНУ-ын хашир туршлагатай Меган Рапино( 2019 оны дэлхийн шилдэг эмэгтэй хөлбөмбөгчин ) болон Келли О'Хара , мөн залуу од София Смит нар алдсан.

Шийдвэрлэх цохилтыг (4:4 байх үед) гүйцэтгэсэн Шведийн Лина Хуртигийн бөмбөгийг АНУ-ын хаалгач хаасан ч бөмбөг гоолны шугамыг миллиметр давсныг Goal-line технологийн тусламжаар тодотгосноор ялалт Шведийн багт ирсэн юм.

Ийнхүү эмэгтэй хөлбөмбөгийн "дархан аваргууд" болох АНУ-ын баг анх удаагаа ДАШТ-ээс "ганзага хоосон" буюу медальгүй гэртээ харих болж байна. Өмнөх 8 удаагийн ДАШТ-ээс америк бүсгүйчүүд 4 алт( 1991,1999,2015,2019), нэг мөнгө (2011), гурван хүрэл ( 1995,2003,2007) медаль хүртэж байсан түүхтэй.

Мөн тэд олимпийн 4 алт,1 мөн,1 хүрэл медальтай. ФИФА-ийн чансаагаар АНУ-ын эмэгтэй баг хэзээ ч хоёроос доошоо эрэмбэлэгдэж байгаагүй гэж байгаа.

Ийм л том баг шөвгийн наймд үлдэж чадсангүй.

Ер нь Швед хөлбөмбөгч хүүхнүүд Америкийн "мэргэжил нэгтнүүдээ" аргалаад байдаг уламжлалтай. 2016 оны Риогийн олимпоор Шведүүд АНУ-ыг шөвгийн наймд бас л "пенальти"-аар мулталж ( АНУ -ын бүсгүйчүүд эмэгтэй хөлбөмбөг олимпийн наадмын хөтөлбөрт орсон 1996 оноос хойш бас цорын ганц удаа медальтгүй үлдсэн нь тэр) байсан билээ.