Коби Брайнтын цогцосны зургийг тараасан ажилчдыг ШҮҮХ ХУРАЛ эхэллээ

2020 оны нэгдүгээр сарын 26-ны өдөр домогт тамирчин Коби Брайнт болон түүний охин нисдэг тэрэгний ослоос үүдэн нас барсан билээ.

Осол болсон газарт ажиллаж байсан цагдаа болон гал сөнөөгчид нас барсан хүмүүсийн цогцосны зургийг авч, хүмүүст тараасан нь ослын дараа ил болсон бөгөөд тэднийг Ванесса Брайнт шүүхэд өгсөн юм.

Тэгвэл Ванессагийн гомдлын дагуух буюу цогцосны зургийн бусадад тараасан этгээдүүдэд холбогдох шүүх хурал орон нутгийн цагаар лхагва гарагт Лос Анжелесийн шүүхэд эхэллээ.

Хар хослол өмсөж, сүйн бөгжөө хуруундаа зүүсэн Ванесса Брайнт хайртай хүмүүсийнх нь амьсгал хураасан үеийн зургийг зүй бусаар авч, бусдад тараасан гэх хүмүүсийн тухай ярьж байхдаа нулимс дуслуулж байв. 

Гэрэл зургийг тараасан этгээдүүдийг хувь хүний нууцад халдсан хэргээр шүүж байгаа бөгөөд Ванесса Брайнт олон сая ам.доллар нэхэмжилж байгаа.

Энэ хэрэгт Лос Анжелесийн шерифийн орлогч болон арав гаруй гал сөнөөгчийг буруутган шүүж байна. Тэд цогцоснуудын зургийг уушийн газар сууж байхдаа бусдад харуулах, групп чат руу илгээх, видео тоглоомын хамтрагч нартаа харуулах зэрэг үйлдэл гаргасан болох нь тогтоогдсон юм.

Гэрчүүдийн хэлж буйгаар ослын газар ажиллаж байсан ажилтан Коби Брайнтийн биеийн тасарсан хэсгүүдийн зургийг маш ойроос авч байжээ. Мөн нэг ажилтан зургийг хүлээж авмагцаа эхнэртээ хандан зургуудийг үзэхийг хүсэж байгаа эсэхийг асуусан байна.

Тэдний цогцсыг "овоолсон мах" хэмээн нэрлэж, бусдад тараан, тохуурхан инээж байгаа бичлэг ч баримт болон үлджээ. Энэ үйлдэл нь Ванесса Брайнт төдийгүй олон хүмүүст хүнд цохилт болж байгааг дурьдан, гэмт этгээдүүдэд зохих хариуцлагыг нь үүрүүлэхийг шүүгчдээс хүслээ.