Ижил хүйстнүүдэд сармагчны цэцгийн эсрэг вакцин хийлгэхийг зөвлөх үү!

Их Британид ижил хүйстэн эрчүүдэд сармагчны цэцэг өвчний эсрэг вакцин хийлгэх зөвлөмж гаргахаар зэхэж байна гэж “Daily Mail”  хэвлэл эх сурвалж дурдан мэдээлжээ. Учир нь бэлгийн уламжлалт бус чиг хандлагатай эрчүүдийн дунд өвчлөл өндөр байгаа аж.

Их Британийн Эрүүл мэндийн агентлагийн мэдээллээр, тус улсад сармагчны цэцэг өвчний халдварын тохиолдол 11-д хүрчээ. Ойрын өдрүүдэд энэ тоо өснө гэж тус агентлаг сэрэмжлүүлж байна. Үүнтэй холбогдуулан тус агентлаг вакцины үйлдвэрлэлийг нэмэгдүүлж эхэлжээ. Өдгөө тус улсад таван мянган тун вакцин бэлэн байгаа бол Их Британийн Засгийн газар 20 мянган тун захиалсан байна.

Ингэхдээ бэлгийн уламжлалт бус чиг хандлагатай эрчүүдийн халдвар өндөр байгаа тул тэдэнд вакцин хийлгэх санал тавьж магадгүй гэж тус хэвлэл онцолжээ.

Дэлхийн эрүүл мэндийн байгууллагын мэдээллээр, сармагчны цэцэг өвчин дэлхийн 11 оронд дэлгэрч, тохиолдлын тоо 80-д хүрээд байна.