Дуучин Анугийн "Тод гэрэлтэх бүсгүй" номын нээлт болно

Дуучин Ану буюу Ч.Уранхолбоог бид таван охины ээж, бүсгүйчүүд, ээжүүдэд зориулсан влог хөтлөгч, соёл урлагийн төдийгүй нийгмийн салбарт өөрийн хувь нэмрээ оруулж яваа манлайлагч, хүмүүнлэгийн үйлстэн бүсгүй гэдгээр нь сайн мэднэ.

Тэгвэл Ану завгүй уран бүтээлч, ээж байхын хажуугаар ном бичиж амжжээ.

“ТОД ГЭРЭЛТЭХ БҮСГҮЙ” нэртэй түүний номын нээлт өнөөдөр 15:30 цагаас "Гэгээнтэн" цогцолборт болно. Дуучин Ану Zindaa.mn сайттай хамтран номынхоо нээлтийг шууд дамжуулна. 
 

"Тод гэрэлтэх бүсгүй" номд эмэгтэй хүний амьдралд тулгардаг бэрхшээлүүдийг хэрхэн даван туулах, гэр бүл төлөвлөлтөө зөв хийх, ирээдүйн ээж нар, залуу хосуудад зориулсан олон зөвлөгөө мэдээлэл, амьд түүх, алдаа оноо, дурсамж дурдатгал багтсан бөгөөд хэрхэн ТОД гэрэлтсэн бүсгүй байх талаар өгүүлжээ.

Номынхоо талаар Ану “Хүн болж төрснийх хүүхэд өсгөж хүмүүжүүл, мод ургуул, ном бичиж үлдээ гэсэн бурхны сургаалыг сэтгэлдээ тээн өөрсдийн туршлага болон судалж мэдсэн зүйлсээ оюундаа тунгаан хоёр найзынхаа хамт уг бүтээлийг бичлээ. Бидний хувьд улс орны хөгжлийн гол цөм нь гэр бүл, гэр бүлийн үндэс нь ээжүүд байдаг гэдэгт итгэдэг. Тиймээс бүсгүйчүүддээ хандан гэрлэхээс өмнө болон гэрлэсний дараа өөртөө ямар шаардлага тавих, аз жаргалаа хэрхэн олох талаар энэ номдоо өгүүлсэн" гэлээ.

Философийн ухааны доктор Г.Уянга, Б.Нарантунгалаг нар энэхүү номыг хамтран бүтээлцсэн ба номын өмнөтгөлд Зууны манлай дуучин, Гавьяат жүжигчин Б.Сарантуяа, Улсын Их Хурлын гишүүн Б.Саранчимэг гээд Монголын сор болсон тод гэрэлтсэн бүсгүйчүүд мялаалга үг хайрласан нь ямархан үнэ цэнэтэй ном болохыг илтгэнэ.

Цахим орчинд идэвхтэй дуучин бүсгүйн Чулуунбаатарын Уранхолбоо пэйжээр дамжуулан энэхүү номын талаар илүү дэлгэрэнгүй мэдээллийг авах боломжтой.