С.ЗОРИГИЙН ХЭРГИЙН ТАЙЛАН: Т.Чимгээтэй хийсэн уулзалт

Олон улсын парламентын холбооны Парламентчдын хүний эрхийн хорооны төлөөлөгчид өнгөрсөн зургаадугаар сарын 5-7-ны өдөр Монгол Улсад ажилласан томилолтын тайлангаас ОНЦОЛЖ байна. Тэд төр, нийгмийн нэрт зүтгэлтэн С.Зоригийн амь насыг хөнөөсөн хэргээр гурван шатны шүүхээс ял сонссон Т.Чимгээтэй уулзжээ. Энэ талаар Олон улсын парламентын холбооны төлөөлөгчид тайландаа дурьдсан ба тайлангийн хэсгээс анхаарал татах хэсгийг товчлон нийтлэв. 

Т.ЧИМГЭЭТЭЙ ХИЙСЭН УУЛЗАЛТ 
 

(Тайлангийн хэсгээс буулгав)
 

Хорих 407 дугаар ангид нэг жил 10 сарын хугацаанд хоригдсоны эцэст Т.Чимгээ өнгөрсөн гуравдугаар сарын 20-ны өдөр хорих ангийн эмнэлэгт шилжүүлсэн. Хорих ангийн эмнэлэгт шилжиж, түүний биеийн байдалд шаардлагатай эрүүл мэндийн тусламж үйлчилгээг авах болсноор түүний хоригдох нөхцөл байдал нэлээд сайжирсан байна. Түүний өмнө нь хоригдож байсан нөхцөл байдал, бие мах бодь, сэтгэлзүйн хувьд хүнд байсныг тэрбээр тайлбарлав. Өнгөрсөн 2017 оны тавдугаар сарын 11-ний өдөр түүнийг баривчлан хорьсны дараах нөхцөл байдал туйлын хүнд байсан бөгөөд гурван сарын турш  түүнийг ариун цэврийн зохих шаардлага хангахгүй өрөөнд хорьж байсан байна. Биеийн байдал нь доройтоход түүнд шаардлагатай эрүүл мэндийн тусламж үзүүлдэггүй байсан ба ар гэр, өмгөөлөгчтэйгөө уулзахыг түүнд зөвшөөрдөггүй байжээ.

Түүнийг 2015-2017 оны хооронд хоригдож байхад Эрүүл мэндийн сайд, Хууль зүйн сайд нар ирж уулзсан гэж Т.Чимгээ мэдэгдсэн. Түр хорооныхон хорих ангийн эмнэлэгт түүнтэй хоёр ч удаа уулзсан байна. Нэмж дурдахад, түүнд хуульд заасны дагуу 45 хоногт нэг удаа гэр бүлийнхэнтэйгээ уулзах эрх бий. 

Төлөөлөгчдөд өгсөн мэдээллээр 2015 оны наймдугаар сард баривчлагдсанаас нь хойш эхний хэдэн өдрийн турш Т.Чимгээг мөрдөн байцаалтын явцад хэд хэдэн удаа айлган сүрдүүлэх, дарамтлах, доромжлох үйлдэл хийгдсэн аж. Түүний хоригдож байсан өрөөний гаднаас нялх хүүхдүүдийн уйлж буй чимээг хэрхэн сонсгож, хүмүүс түүнийг хэрхэн хамаагүй доромжилж, айлган сүрдүүлэх  гэж хараан зүхэж байсан тухай тэрбээр өгүүлэв. Т.Чимгээ төлөөлөгчдөд мөн мэдээлэхдээ 2015 оны есдүгээр сарын  8-нд хэрэг бүртгэгч байцаагч нь маргааш  /2015 оны есдүгээр сарын 9-ний өдөр/ түүнийг полиграфийн сорилд орно гэж хэлсэн гэв. Т.Чимгээгийн хэлснээр сорилын өмнөх өдөр Ц.Амгаланбаатарыг өрөөнд оруулж ирсэн байв. Тэрээр хагас нүцгэн, тамхи татсан байдалтай байв. Т.Чимгээгийн хэлснээр түүнийг доромжилж, заналхийлсэн үг хэллэг хэрэглэн дарамталж хэрэг хүлээлгэх зорилгоор Ц.Амгаланбаатарыг өрөөнд нь авч ирсэн гэв. Түүний байгаа эмзэг байдлыг харгалзан 2015 оны есдүгээр сарын 9-нд полиграфийн сорилд оруулахыг хориглосон байж. Гэтэл хэрэг бүртгэгч нь түүнийг худал хэлж байна хэмээн буруутгаж, сорилыг хүчээр явуулсан тул амжилтгүй болжээ.

Анхан шатны шүүхийн шийдвэр гарахаас өмнө Т.Чимгээ есөн сарын турш зоорь өрөөнд хоригдож байв. Түүнийг цагдан хорих нөхцөл маш хүнд байсан байна. Хэргээ хүлээхийг албадахын тулд сэтгэл зүйг нь доройтуулах гэж оролдсон хэмээн тэрээр тайлбарлав. Т.Чимгээгийн хэрэг бүртгэгч байцаагч нь хэргээ хүлээсэн мэдүүлэг бичүүлэх гэж байнга шахаж, дээрэлхдэг байсан ч тэрээр бичихээс үргэлж татгалзаж иржээ. Гэсэн ч анхан шатны шүүхийн шийдвэрийн дагуу Т.Чимгээг цагдан хорих өөр байр руу шилжүүлснээр хоригдох нөхцөл байдал нь үл ялиг сайжирч шүүхийн шийдвэрийг давж заалдах боломжтой болсон аж.Төлөөлөгчдөд мэдээлснээр Т.Чимгээгийн эсрэг гаргасан шүүхийн шийдвэрийн цорын ганц нотлох баримт нь Ц.Амгаланбаатарын мэдүүлэг байв. Учир нь, Т.Чимгээ гэмт хэрэг үйлдсэн гэж хэзээ ч хүлээн зөвшөөрөөгүй аж.

Төлөөлөгчдийн ажигласнаар Т.Чимгээд бие мах бодийн эрүү шүүлт тулгаагүй ч хоригдож байх хугацаанд нь тасралтгүй дарамталж, айлган сүрдүүлж байсан байна. Т.Чимгээгийн хэрэг бүртгэгч байцаагч охиныг нь түүний үйлийн үрээр авто тээврийн осолд орж, нас барсан хэмээн мэдээлж, буруутгасан нь дарамт шахалт дээд цэгтээ хүрсний илрэл байв. Төлөөлөгчид Т.Чимгээгийн охины үхлийг санаатай, эсвэл эрх баригчдын мэдэгдсэний дагуу санамсаргүй байдлаар тохиосон  эсэхийг тодорхойлох боломжгүй байв. Т.Чимгээгийн итгэлийг эрс бууруулсан байна. Тэрбээр төлөөлөгчдөд хэлэхдээ эрүүдэн шүүсэн талаар гомдол гаргах боломжгүй байсан учир нь, тэрбээр охиныхоо үхэлд өөрийгөө буруутгаж, айдаст автаж сэтгэцийн хувьд эмзэг байсан гэв. Т.Чимгээ төлөөлөгчдөд давж заалдах шатны шүүхийн шийдвэр гарсны дараа Монголын шүүх засаглалын тогтолцоонд бүрэн итгэхээ больсноо хэлэв. Гэсэн ч зөвхөн улс төрийн шийдлээр л энэ хэрэг нэгэн өдөр дуусна гэдэгт тэрээр итгэлтэй буйгаа илэрхийлэв.