Хуулийн этгээдийн оноосон нэрээ цахимаар авах боломжтой боллоо

Төрийн үйлчилгээг иргэдэд ойртуулах, түргэн шуурхай болгох Засгийн газрын бодлого зорилтын хүрээнд Хуулийн этгээдийн оноосон нэрийг цахимаар олгодог болсон талаар Оюуны өмч, улсын бүртгэлийн ерөнхий газраас мэдээллээ.

Тодруулбал, өнөөдрөөс /2018.04.10/ эхлэн иргэд www.burtgel.gov.mn сайт руу орж, аж ахуй нэгжийнхээ нэрийг өөрсдөө шүүн, боломжит хувилбаруудыг илгээн баталгаажуулж, хуулийн этгээдийн нэрээ авах боломжтой аж.  

Өдөрт дунджаар 100-200, жилдээ 20-40 мянган иргэн зөвхөн оноосон нэр авахын тулд зуун айл дахь улсын бүртгэлийн газрыг зорьдог гэнэ. Ийнхүү нэрийг цахимаар олгосноор иргэдийн цаг зав, төсөв зардлыг хэмнэх юм.

Дашрамд дурдахад өнгөрөгч хугацаанд хуулийн этгээдийн улсын бүртгэлийн мэдээллийн сангаас нийт 200 мянга орчим оноосон нэр олгожээ.

ОӨУБЕГ нь цаашид шинээр байгуулагдах ХХК, зарим төрлийн нэмэлт өөрчлөлтийн бүртгэлийг цахимаар хийхээр зорьж байгаа аж.

Д.Үржинбадам

WWW.ZINDAA.MN