Э.Бат-Үүл: Дугаарын хязгаарлалт эргээд замын ачааллыг ихэсгэх аюултай

Ирэх сарын 15-аас аравдугаар сарын 1-нийг хүртэл Улаанбаатар хотод дэд бүтэц, бүтээн байгуулалтын ажил өрнөхтэй холбогдуулан замын хөдөлгөөн, автомашины дугаарын хязгаарлалтад өөрчлөлт оруулахаар иргэдээс санал авч эхлээд байгаа юм.

Тодруулбал, зуны бүтээн байгуулалтын их ажлын үеэр дугаарын хязгаарлалтыг хоёр өдөр үйлчилж байхаар болгоно. Ингэхдээ  "Лхагва гарагт сондгой буюу 1, 3, 5, 9 дугаараар төгссөн автомашин, мягмар, пүрэв гарагт 0, 2, 4, 6, 8-аар төгссөн автомашин хөдөлгөөнд оролцох юм. Харин баасан гарагт Нарантуул, Бөмбөгөр, Хар хорин, Барс зэрэг томоохон худалдааны төвүүдийг амраах зохицуулалтыг" хийнэ гэдгийг  Нийслэлийн Засаг даргын Дэд бүтэц, гэр хорооллын хөгжлийн асуудал хариуцсан орлогч П.Баярхүү мэдэгдсэн. 

Өөрөөр хэлбэл,  үлдсэн гурван өдөр нь бүх тээврийн хэрэгсэл замын хөдөлгөөнд оролцох боломжтой юм. Дээрх саналыг хэрэгжүүлэх эсэх нь иргэдийн санал хураалтын шийдвэрээс хамаарна гэдгийг хотын удирдлагууд онцолж байгаа ч  жолооч болон иргэдийн дунд ихээхэн шүүмжлэл дагуулж байгаа юм. 

Түүнчлэн МАН-ын Ерөнхий нарийн бичгийн дарга, НИТХ-ын төлөөлөгч Д.Амарбаясгалан ч нэлээд бухимдаж "Ямар ч судалгаагүй дугаарын хязгаарлалт, тэгш сондгойн хязгаарлалт гэдэг балай юм аа одоо боль. Хотын иргэдээр хангалттай тоглож байна наад замын асуудал хариуцсан нөхөд чинь" хэмээгээд саналаа Туркээс өчигдөр ирүүлсэн.

Тэгвэл энэ талаар хотын дарга асан Э.Бат-Үүлээс тодруулахад тэрбээр "Юуны урьд сайтар судалж, шийдвэр гаргах хэрэгтэй. Замын хөдөлгөөний ачааллыг ямар түвшинд хүргэх үү гэдгийг шинждэг бэлэн программууд байдаг. Бид өмнө нь ч энэхүү бэлэн программууд дээр судалж байсан. Долоо хоногт  дугаарын хязгаарлалттай таван өдөр дээрээс нь  тэгш, сондгойгоор нь хязгаарлалт хийвэл буцаад замын хөдөлгөөний ачаалал бүр алдагдах талтай юм билээ. Өөрөөр хэлбэл, замын ачааллыг улам бүр ихэсгэх талтай. Тиймээс сайн судлах хэрэгтэй" гэлээ. 

Ш.АДЪЯАМАА