Эмнэлгийнхэнд энэрэх сэтгэл байна уу?

Уг нь энэрч асрах ухаан эмнэлгийнхэнд л цогцолсон байх учиртайсан. Гэвч тийм ухаан, тийм сэтгэл цагаан нөмрөгтнүүдийн заримд нь байдаггүй бололтой. Энэ бүхнийг гэрчлэх маш харамсалтай, дэндүү эмгэнэлтэй нэгэн жишээг одоо өгүүлэх гэж байна.

Төрөөд дөнгөж нэг сар болж байгаа бүсгүйн бие нь нэг л биш, чилээрхэх болсон тул түргэний эмч дууджээ. Эмч ирээд бүсгүйг үзэж, мэдрэлийн ядаргаа ихтэй, даралт тогтворгүй, хэрэг бишидвэл харвалт өгөх эрсдэлтэй байгааг нь оношилжээ. Ингээд тэр шөнөдөө гэртээ тайван амрахыг зөвлөж, маргааш өглөө шууд Гуравдугаар эмнэлэгт очиж үзүүлэхийг зөвлөжээ. Бүсгүй ч эмчийнхээ зөвлөснөөр маргааш өглөө нь Гуравдугаар эмнэлэгт очиж үзүүлэх гэтэл хүлээн авахын сувилагч нь "Хоёр хөл дээрээ явж байгаа ийм хүнийг манайх хүлээж авахгүй. Харьяа дүүргээрээ очиж үзүүл" гэх юм яриад  хөөх шахам гаргажээ. Нялх биетэйг хэлэх үү, дээрээс нь толгойн өвдөлт нь тэсэхийн аргагүй байсан тул хөөрхий бүсгүй ямартаа ч эмнэлгийн бараа л харахыг хүсэж харьяа дүүргийнхээ эмнэлэгт очжээ. Мэдээж  улсын л эмнэлэг юм хойно үзүүлэх цаг авах, цаг авахын тулд дарааллаж зогсох гэж явсаар байгаад хугацаа алдах нь тодорхой. Энэ хооронд бүсгүй нэгэнт харвалт өгчээ. Маш хүнд хэлбэрийн харвалт болохыг эмч нар оношилж, яаралтай хагалгаанд орох шаардлагатай болжээ. Хагалгаанд ороход нь ар гэрийнхнээс нь гомдолгүй гэсэн гарын үсэг зуруулж авсныг бодоход амь насанд нь асар өндөр эрсдэл буй болсныг гэрчлэх биз ээ. Харвалт гэдэг өвчин цаг алдвал амь насанд  аюул авчирдаг, харин эсрэгээрээ цаг алдалгүй зөв эмчилж чадвал өндөр эрсдэлээс  сэргийлэх бүрэн боломжтой байдаг.

Мэдээж ниргэсэн хойно нь хэчнээн хашгираад ч нэмэргүй. Хөөрхий бүсгүйд тохиолдсон харамсалтай энэ тохиолдлын дараа ар гэрийнхэн нь төдийгүй энэ явдлыг сонссон хүн бүхэн "Хэрвээ анх Гуравдугаар эмнэлэгт ирэхэд нь л хүлээж аваад үзчихсэн бол өнөөдөр ингээд эмнэлгийн орон дээр ухаангүй хэвтэхгүй байсан даа", "Хэрвээ ингэсэн бол", "Хэрвээ тэгсэн бол" хэмээн харуусан сууцгааж байна. Ийнхүү энэрэнгүй сэтгэл дутсан эмнэлгийн ажилтны хариуцлаггүй байдлаас болж хөхнийхөө сүүг асгаруулсан хөөрхий бүсгүй хүнд хэлбэрийн харвалт өгчихөөд эмнэлэгт ухаангүй хэвтэж байх гэж. Мөөмөө санан уйлах нярай, нялх үрийнхээ төлөө үхэл амьдралтай тэмцэх бүсгүй, хайртай ханиа, хайртай охиноо, хайртай эгчийгээ, хайртай дүүгээ эсэн мэнд үлдэхийг залбирч суугаа тэр гэр бүлийнхэн... Бодохоос л өр өвдөм.

Энд нэг л зүйлийг хэлэхийг хүсэж байна. Эмнэлгийн хаалга татаад явж байгаа хүнийг эмнэлгийнхэн минь өөриймсгөөр хандаж, "Цаашаа" гэж зандрахын оронд өвчин шаналал, учир шалтгааныг нь нааштайхан шиг нэг сонсчихож баймаарсан

С.Баяр

Эх сурвалж: Zindaa.mn