П.Баярхүү: ”Нарантуул” гэх мэт худалдааны төвүүдийн амралтын өдрийг баасан гаригт болгоно

Замын бүтээн байгуулалттай холбоотойгоор долоо хоногийн хоёр өдөр дугаарын хязгаарлалт үйлчилж эхэлнэ гэх мэдээлэл байгаа юм. Тэгвэл энэ талаар Нийслэлийн Засаг даргын Дэд бүтэц, гэр хорооллын хөгжлийн асуудал хариуцсан орлогч П.Баярхүүгээс тодрууллаа.

-Долоо хоногийн хоёр өдөр зайлшгүй дугаарын хязгаарлалт үйлчилдэг болгох шаардлагатай юу?

-2018 онд хийгдэх нийслэлийн бүтээн байгуулалтад замын болон бусад засваруудын ажил орж байгаа. Үүнтэй холбоотойгоор замын зохион байгуулалтыг зайлшгүй хийх шаардлага тулгарч байна. Дөрөвдүгээр сарын 15-аас 10 дугаар сарын 1 хүртэл дэд бүтцийн бүтээн байгуулалтын ажил өрнөнө. Замын цагдаагийн гүүрэн гарц, зүүн дөрвөн замын хоёр түвшний огтлолцол бүхий давхар гүүрэн гарцыг барих, дулааны цэвэр усны шугамыг Австрийн технологиор доторлох гэх мэт ажлуудыг хийхээр зэхэж байгаа. Эдгээр болон авто замын ажлууд хийгдэхтэй холбоотойгоор зарим замуудыг хэсэгчлэн хаах хуваарьтай байгаа. Өчигдөр Нийслэлийн засаг даргын зөвлөлийн хурлаар Улаанбаатар хотод хийгдэх бүтээн байгуулалтын нэгдсэн хуваарийг баталсан.

-Ямар газруудад бүтээн байгуулалтын ажил хийгдэх вэ?

-Зүүн дөрвөн замын уулзвар, Замын цагдаагийн уулзвар, Энхтайвны гүүр, Өгөөмөр захын урд талд  тус тус гүүрэн гарцыг барина. Бид нийт 20 уулзварыг 2 түвшний огтлолцтой болгоё гэсэн зорилтыг тавиад байна. Үүний хүрээнд Зүүн дөрвөн зам, Замын цагдаагийн уулзвар, Яармагийн гүүр гэсэн ажлуудыг эхний ээлжинд хийхээр төлөвлөж байна. Ирэх жил үлдсэн 18 уулзварыг цэгцэлнэ.

-Дугаарын хязгаарлалтыг хэрхэн зохицуулахаар болж байна?

-Зуны бүтээн байгуулалтын их ажлын үеэр дугаарын хязгаарлалтыг хоёр өдөр үйлчилж байхаар болгоно. Тухайлбал, лхагва гарагт сондгой буюу 1, 3, 5, 9 дугаараар төгссөн автомашин, мягмар, пүрэв гарагт 0, 2, 4, 6, 8-аар төгссөн автомашин хөдөлгөөнд оролцох юм. Харин баасан гарагт Нарантуул, Бөмбөгөр, Хар хорин, Барс зэрэг томоохон худалдааны төвүүдийг амраах зохицуулалтыг хийнэ. Өөрөөр хэлбэл эдгээр худалдааны төвүүдийн амрах өдрийг нь 5 дахь болгох юм. Ингэснээр үлдсэн гурван өдөр бүх тээврийн хэрэгсэл замын хөдөлгөөнд оролцох боломжтой. Үүнд хотынхоо иргэдийг хамтарч ажиллаач гэж хүсч байна.

-Гүүрэн гарц байгуулах газруудаас хамгийн их анхаарал татаж байгаа нь Замын цагдаагийн уулзвар байна. Энэхүү уулзварын гүүрэн гарцыг хэр хурдан хугацаанд барих вэ?

-Замын цагдаагийн гүүрэн гарцын уулзварын засварын ажлыг 2,5 жилийн хугацаанд хийж гүйцэтгэх ёстой байсан. Харин одоо зам хаах учир график гүйцэтгэгч компанитайгаа харилцан тохиролцоод тээврийн хэрэгсэл болон ажиллах хүчээ нэмж, жил зургаан сарын дотор бүтээн байгуулалтын гүйцэтгэхээр болоод байна. Дөрөвдүгээр сарын 15-аас 10 дугаар сарын 31 хүртэл гүүрний ул суурь, дам нурууны ажил бүрэн хийгдэх болно. Замын цагдаагийн уулзвар нь Улаанбаатар хотын өмнөд хойд хэсгийг холбосон томоохон уулзвар бөгөөд өдөрт 20 орчим мянган тээврийн хэрэгсэл зорчдог юм.

-Замын цагдаагийн уулзвар дээр гүүрэн гарц байгуулснаар замын ачаалал хэдэн хувиар буурах бол?

-Гүүрэн гарцын бүтээн байгуулалтыг хийснээр зам түгжрэлгүй болно. Төмөр замаар өдөрт 40 галт тэрэг зорчиж, автомашиныг хөдөлгөөнийг хязгаарлаж, түгжрэл үүсгээд зогсохгүй, зам тээврийн осол их гардаг. Энэхүү гүүрэн гарцыг барьснаар эдгээр асуудлуудыг бүрэн шийднэ. Мөн Дүнжингарав, Баянгол хорооллын хөдөлгөөнийг таслахгүйгээр бүтээн байгуулалтын ажлыг хийнэ. Тухайлбал, туслах болон холбоос замуудыг нэмэх төлөвлөгөөтэй байгаа

-“Нарны зам”-ыг хаана гэсэн мэдээлэл байгаа?

-Иргэдийн дунд бүтээн байгуулалттай холбоотой буруу ташаа ойлголт байна. “Нарны зам”-ыг бүрэн хаагдана гэх мэт. Тэгвэл “Нарны зам” болон Баянзүрх дүүргийн “Натур зам”-ын хөдөлгөөний урсгал хаагдахгүй.

-Иргэдээс дугаарын хязгаарлалттай холбоотой санал асуулга авна гэсэн. Хэрхэн авах вэ?

-Маргаашнаас дөрөвдүгээр сарын 15-ыг хүртэл иргэдээс санал авна. Хэвлэл мэдээллийн хэрэгслээр болон Нийслэлийн хэвлэл мэдээллийн албаны сайтуудаар авах юм. Дугаарын хязгаарлалтын талаар болон бүсчлэлд шилжих тухай саналыг мөн авна. Гуравдугаар сарын 25-аас Зуны бүсчлэлд шилждэг. Тэгвэл одоо зохицуулж байгаа хуваарийн дагуу өвлийн цагийн бүсчлэлээрээ байхуу эсвэл зуны цагийн бүсчлэлд шилжих үү гэдгийг иргэдээс санал авч шийднэ.

-Хэрэв иргэд зөвшөөрөхгүй бол яах вэ?

-Одоо хэрэгжиж байгаа зохицуулалтаараа явна. Долоо хоногт нэг удаа  дугаарын зохицуулалт үйлчилж байхад дээрх бүтээн байгуулалтыг хийнэ. Түгжрэл ихсэх байх. 

-Нийтийн тээврийн хэрэгсэл болон хэвлэл мэдээллийн байгууллагын машинд дугаарын хязгаарлалт үйлчлэх үү?

-Хуучнаараа нийтийн тээврийн хэрэгсэл болон хэвлэл мэдээллийн байгууллагын машин, такси зэрэг зөвшөөрөгдсөн тээврийн хэрэгсэлд дугаарын хязгаарлалт үйлчлэхгүй. Нийт машины 32 хувьд дугаарын хязгаарлалт үйлчлэхгүй гэсэн үг. Шинээр зохицуулагдах ажил хэрэгжээд эхэлбэл өмнөх захирамж цуцлагдана.

-Дугаарын хязгаарлалтыг долоо хоногт хоёр удаа үйлчилдэг болгосноор иргэд нийтийн тээврээр зорчих болно. Нийтийн тээврийн хүрэлцээний асуудлыг хэрхэн шийдэж байна?

-Нийтийн тээврийн хэрэгслийн 13 чиглэлд тодорхой тооны автобуснуудыг нэмэх судалгааны ажлыг хийж байгаа. Автобус нэмэхэд хэдэн төгрөгийн зардал гарах вэ гэдгийг судалж байна.

-Замын ажил хийх компаниудыг хэрхэн шалгаруулах вэ?

-Замын ажил хийх компаниудад Зам тээврийн яам эрх олгодог. Тендерт оролцож байгаа компаниудыг үнэлгээний хороо шалгаруулна. Энэ зарчмаараа л явна.

Б.Янжиндулам

www.zindaa.mn