Дөрвөн настай хүүг заазуурдаж, эхнэрээ хөнөөсөн Г.Өргөнталыг шүүнэ

Сонгинохайрхан дүүргийн 19 дүгээр хороонд өнгөрсөн 2016 оны арванхоёрдугаар сарын 30-31-нд шилжих шөнө дөрвөн настай хүүг, ээжийнх нь хамтаар заазуурдан хөнөөж, дагавар хүүхдээ хүнд гэмтээсэн ноцтой хэрэг гарсан билээ.

БНХАУ-ын ӨМӨЗО-ы Хорчин зүүн үзэмчин хошуунд төрсөн, орчуулагч мэргэжилтэй Г.Өргөнтал гэгч этгээд энэхүү ноцтой хэргийг үйлдсэн юм. Уг хэргийг цагдаагийнхан шалгаж дуусаад яллах дүгнэлт үйлдүүлэхээр НПГ-т шилжүүлсэн аж. Тус газраас “Мөрдөн байцаах газрын Онц хүнд гэмт хэрэг мөрдөх хэлтсээс шалгасан. Хувийн таарамжгүй харилцаанаас болж эхнэр Х-г гар, толгойд нь зургаан удаа заазуурдаж амийг нь хохироосон.

Уг гэмт хэргээ нуун далдлах зорилгоор гэрт нь байсан дөрвөн настай А-ын зулайд хүйтэн мэсээрээ цохиж хөнөөсөн, 12 настай Б-ын толгойд заазуурдаж хүнд гэмтэл учруулан санаатайгаар бүрэлгэхийг завдсан хэрэгт яллах дүгнэлт үйлдэж, шүүхэд шилжүүлсэн байгаа юм.

Тэгвэл Г.Өргөнталд холбогдох ЭХТА-ийн 91.2.2, 91.2.6, 91.2.12,91.2.15, 91.2.16-д тус тус зааснаар яллах дүгнэлт үйлдэж ирүүлсэн хэргийг Сонгинохайрхан дүүргийн шүүхэд энэ сарын 21-ний 11.00 цагт шүүх хуралдаанаар хэлэлцэх тов гарчээ.