Оросын эмэгтэйчүүд үр хөндөлтийг дэмжив

Оросын олон нийт эмэгтэй хүн жирэмслэлтээ таслан зогсоох, үүнийхээ төлөө шүүгдэхгүй байх эрхтэй гэж үзэж байна. Олон нийтийн санаа бодлыг судлах бүх Оросын төв гэх байгууллагаас явуулсан санал асуулгын дүн ингэж гарчээ. Оролцогчдын 72 хувь нь үр хөндөлтийг эрүүл мэндийн даатгалын үйлчилгээнээс хасах хэрэггүй гэсэн байр суурийг илэрхийлсэн байна. Тэд үр хөндөлтийг хориглох нь нийгэмд сөрөг нөлөө үзүүлнэ гэж үзсэн байсан бөгөөд 31 хувь нь “Хууль бус үр хөндөлт нэмэгдэнэ”, 13 хувь нь “Тэнэмэл хүүхдийн тоо өснө”, 11 хувь нь “Ядуурлын төвшин нэмэгдэнэ” гэсэн шалтгааныг дурдсан байжээ.

Оросын үнэн алдартны шашны тэргүүн Кирилл өнгөрсөн сарын 27-н ы өдөр олон нийтэд хандан ил захидал бичиж, үр хөндөлтийг хориглохыг уриалсан бөгөөд нийгмийн зүтгэлтэн Анна Кузнецова дэмжсэн мэдэгдэл хийсэн юм. Улмаар Төрийн Думын гишүүд уг асуудлаар үзэл бодлоо илэрхийлэн санал хуваагдаад байжээ.     

С.Төгөлдөр