Экс сайд Эв нэгдлийн хөдөлгөөн байгуулжээ

Эрүүл мэндийн сайдын суудлаас буусан Н.Удвал ээлжит нэгэн ажлаа эхлүүлжээ.  Монгол Улсын Ерөнхийлөгчид хүртэл нэр дэвшиж чадсан тэрбээр энэ удаад хэн нэгний баруун гар биш харин өөрийн гэсэн хөдөлгөөнийг нээлээ. Уг хөдөлгөөнийхөө нээлтийг өнөөдөр Монголын Үндэсний худалдаа аж үйлдвэрийн танхимд хийсэн байна. Түүний санаачилсан уг хөдөлгөөний зорилго нь хувь хүн, өрх бүл, найз нөхөд, хамт олон, орон нутаг, үндэсний хэмжээний нийтлэг үнэт зүйлсийг сэргээн хөгжүүлэх, үнэт зүйлс дээрээ бүх нийтээрээ эв санааны нэгдэлтэй болох, бүх түвшин дэх үл ойлголцол, зөрчил зөрөлдөөнийг энхийн аргаар шийдвэрлэхэд гишүүд иргэдийн чадавхийг бэхжүүлэх, үнэт зүйлээ хайрлан хамгаалах ур чадвартай болгох, эвийн хүчээр хувь хүн, гэр бүл, улс орны зүй зохистой хөгжлийг хангахад дэмжлэг үзүүлэх чадавхийг бүрэлдүүлэх гэнэ.