Бааварын ээж Хууль зүйн сайдад хандах гэнэ

Хорих ангид саатуулагдаж байхдаа гал шатсан дуучин Ш.Батбаяр буюу Бааварын биеийн байдал арай дээрдэж байгаа гэнэ. Харуул хамгаалалтаас ангижирч, хэвлэлийнхэнтэй чөлөөтэй уулзах болсон ар гэрийнхэн нь нэлээд хатуу байх сууринаас мэдэгдэл өгч байгаа. Ялангуяа дуучин залуугийн ээж “Хүүтэй минь ёс бусаар харьцаж, гав гинжээр түрий барьсан албан хаагчид өнгөрсөн хугацаанд нэг ч удаа ирж уучлалт гуйгаагүй. Миний хүү өөрийгөө шатаах ухамсар дорой хүн биш, удам судраа яривал манайх угсаа гарал сайтай. Ээжийгээ түшиж, асарч халамжилдаг сайн хүү минь амьд мэнд байвал хөгшин би үхэхэд гомдолгүй” хэмээн учирлаж сууна.

Хэдийгээр таагүй хэрэгт холбогдон өргөст торны цаана суух дээрээ тулаад байсан ч тэрбээр энэ бүх асуудалд эх хүний халуун сэтгэл, гашуун нулимсаа нууж чадалгүй хүүгээ өмгөөлж байгааг буруутгах ёсгүй юм. Өөрөө ч хоолоо идэж чадахааргүй хүнд өвчтэй байгаа Бааварыг асран дээшээ тэнгэр хол, доошоо газар хатуу гэгчээр шаналж яваа энэ эх ирэх долоо хоногт Хууль зүйн сайдад өргөдөл гарган, өөрийн биеэр очиж уулзах гэнэ.

С.Цахиур