Бурханаар “бөөлжигч” цагдаатай зууралдав

Хөвсгөл аймгийн Галт суманд 20 настай нэгэн бүсгүй эрдэнийн чулуугаар бөөлжиж, бурханаар гулгиад сүйд болсныг уншигчид маань мэднэ. Дээд тэнгэрээс “заяатай” хутагт хувилгаадын хойд дүр хэмээн өөртөө итгэсэн мөнөөх бүсгүйг бөөлжих тоолонд нөхөр нь тусалж, аав нь бурханлиг охиноо сурталчлах гээд тун ч завгүй явсан. Тэр ч байтугай, тус аймгийн телевизийн захирал нь хүртэл ирж үзээд үнэмшсэн гэж байгаа. Ганданд суулгаад бурханаар бөөлжүүлж баймаар энэ хүүхнийг нутгийнхан нь эгээтэй л шилэн хоргонд хийгээд хотод авчирсангүй. Тэднийхээр бол, бурханлиг хүүхнийг Монгол Улсын Ерөнхийлөгч ивээлдээ авч, төр түмнээрээ өмнө нь сөхрөх ёстой байсан юм байх. Даанч тэгсэнгүй. Шинжлэх ухааны академийн эрдэмтэн доткорууд элгээ хөштөл инээлдээд хаалгаа ч нээх тэнхэлгүй суусан бол, эрүүл мэндийн салбарынхан “Мэдрэлийн эмчид үзүүл” гээд халгаагаагүй гэсэн. Энэ мэт инээдтэй жүжигт дасал болсон байлгүй дээ, тэд.

Уг хэрэг явдлын улмаас аймгийн удирдлагууд нь бурханаар “бөөлжигч” бүсгүйн гэрт очиж, учир байдлыг лавлахад юу ч харагдаагүй аж. Ходоодонд нь хоёр дархан суугаад бурхан урлаад байдаггүй л юм бол, чухам хаанаас нь ингэж бурхан “ургаад” байдгийг мэдэх юм алга. В.Мөнгөнчимэг бүсгүйн бөөлжих бурхан дууссан уу, яасан. Шалгалтаар ирсэн хүмүүсийн өмнө бурхан битгий хэл, будаагаар ч бөөлжөөгүй юм гэдэг. Ингэж байтал түүнд бурхан худалдсан гэх нэгэн эмэгтэйн яриа энэ жүжигт цэг тавьсан. Гэр бүлээрээ жүжиглэх авьяастай гэдгээ нутгийнхаа зон олны өмнө яруу тодоор харуулсан тэр айл гэрээсээ ч цухуйх нүүргүй болоо биз. Гэхдээ улс орон даяар сүржигнэж, худал мэдээллээр олныг хуурсан бурханаар “бөөлжигч” бүсгүйд хариуцлага тооцох ёстой. Тиймдээ ч аймгийн цагдаагийн байгууллагынхан В.Мөнгөнчимэг бүсгүйг залилангийн хэрэгт холбогдуулан шалгаж эхэлсэн гэнэ.

Р.Есүй