Баавар бусдын эд хөрөнгийг санаатайгаар шатаасан хэргээр ял сонсож магадгүй нь

Дижитал хамтлагийн дуучин Баавар шүүх хуралдаа ирээгүй гэх шалтгаанаар хоригдож байсан ч сахилгын өрөөнд байхдаа галд өртөж биеийнх нь 35 хувь нь түлэгдсэн. Эл хэргийн талаар өөрөө хэлэхдээ гал цахилгааны утаснаас гарсан байж болзошгүй бөгөөд түүнийг шатаж байхад харгалзагч нар тусламж үзүүлээгүйн улмаас амь насаа алдаж магадгүй хэмжээнд түлэгдсэн хэмээн гомдол гаргасан. Асуудал ийн өрнөж буй учраас Бааварт холбогдох хар тамхины хэргийг тодорхойгүй хугацаагаар түтгэлзүүлээд байгаа бөгөөд одоогоор Бааварын түлэгдсэн асуудал, галын шалтгааныг тодруулж байгаа юм.

Тэгвэл өнгөрсөн баасан гарагт хорих ангид гарсан галын шинжээчийн албан ёсны дүгнэлт гарсан бөгөөд уг дүгнэлтээс харвал Баавар өөрийгөө шатаахыг оролдсон бололтой. Ямартай ч Баавартай хамт хоригдож байсан хоригдлуудын хэлснээр Баавар биедээ цэнхэр өнгийн, дээрээ “Оригналь асаагуур” гэсэн бичигтэй асаагуур байнга авч явдаг байсан гэнэ. Эл асаагуураа хааяа гаргаж хэрэглэдэг байсан бөгөөд ихэнхдээ ариун цэврийн цаасыг тамхины хэлбэртэй болгоод түүнийгээ асаадаг байсан аж. Өөрөөр хэлбэл тамхины оронд ариун цэврийн цаас татаж байжээ.

Хэдийгээр хорих ангийн харгалзагч нар Бааварыг сахилгын өрөөнд оруулахдаа шаардлагатай үзлэг, нэгжлэгийг хийсэн гэж байгаа боловч Баавар асаагуураа авч орсон байж болзошгүй байна. Учир нь түүний хоригдож байсан сахилгын өрөө буюу гал гарсан өрөөнөөс бусад хоригдлуудын мэдүүлсэн “Оригналь асаагуур” гэсэн бичигтэй цэнхэр өнгийн асаагуур олджээ. Уг асаагуурыг Бааварынх гэж шууд нотлох боломжгүй ч хэнийх болохыг нь тодруулахаар нарийн шинжилгээнд өгөөд байгаа гэнэ.

Харин шинжээчийн дүгнэлтэд дурьдснаар бол ил галын улмаас түймэр гарсан бөгөөд ийн тодорхойлжээ.  “Тус өрөөнд гарсан галын байдал, шаталтын явц зэргээс үзэхэд ил галын улмаас гал түймэр гарсан байна /Ил гал гэдэгт лаа, зул, бамбар, тамхи, чүдэнзний болон халуун цогтой үнс нурам, тамхины асаагуурын гал зэрэг орно/. Мөн галын голомт нь тус өрөөний баруун урд буланд байсан орны толгойн орчимд болон хананы хэсэгт байжээ. Уг өрөөнд байсан гэрэлтүүлэг болон хяналтын камер, утааны дохиоллын системийн утаснаас оч үсэрч гал гарсан байх боломжгүй байна” гэж дүгнэжээ.

Мэдээж дүгнэлт гаргахаасаа өмнө хорихын өрөөнд ямар шалтгааны улмаас гал гарсан, галын голомт хаанаас үүссэн, уг камерийн өрөөнд байсан цахилгааны утаснаас оч үсэрч гал гарсан байж болох эсэх, гал өөр ямар хүчин зүйлийн улмаас үүссэн байж болох, галын тархалт ямар чиглэлтэй байсан талаар нарийвчлан шинжилсэн байна.

Сахилгын өрөөний гэрэлтүүлэг ханандаа бэхлэгдсэн зузаан шилэн бүрхүүлтэй төдийгүй гал гарсны дараа ч өрөөний гэрэлтүүлэг хэвийн ажиллаж байжээ. Харин хяналтын камерны холболтыг далд монтажаар хийсэн учраас ил гал гаргах ямар ч боломжгүй аж. Тиймээс хорих өрөөнд гарсан гал түймэр нь ил галын улмаас буюу хүний үйл ажиллагаатай холбоотой гэж үзсэн байна. Өөрөөр хэлбэл хэн нэгэн нь галыг санаатайгаар тавьсан байж болзошгүй байна гэж үзжээ.

Бааварын хоригдож байсан өрөөнд түүнээс өөр хэн ч байгаагүй. Тэгэхээр Баавар өөрөө өөрийгөө санаатайгаар шатаасан байж болзошгүй юм. Хэрэв Баавар өөрийгөө шатааж хорихын өрөөнд гал тавьсан нь шалгалт, шинжилгээгээр батлагдвал Эрүүгийн хуулийн 153.2 буюу бусдын өмч хөрөнгийг галдан шатаах замаар санаатайгаар устгасан гэх хэргээр доод тал нь таван жилийн ял сонсож магадгүй юм.