Би “ПЛЕЙБОЙ”-д зургаа авахуулахад бэлэн биш байна

Автор | Zindaa.mn
2012 оны 03 сарын 22
  • “Esquire” сэтгүүлийн газраас дэлхийн хамгийн тачаангуй эмэгтэй тамирчдын жагсаалтыг гаргахад Америкийн гольфчин, литва гаралтай Натали Гульбис дээгүүр байр эзэлжээ. Өдгөө 27 настай тэрбээр дэлхийн чансаанд 64 дүгээрт эрэмбэлэгддэг ч төрөл бүрийн реалити шоунд оролцдогоороо, ивээн тэтгэгчидтэй олон сая долларын гэрээ байгуулдгаараа мэргэжил нэгт бүсгүйчүүдээ дагуулахааргүй нэгэн. Хэзээ нэгэн цагт Майкл Жордан шиг өөрийн гэсэн брэндтэй болно хэмээн ярьдаг Гульбис цагтаа Тайгер Вудстай хамтран бэлтгэлээ базааж байжээ. Ингээд “Барби-гольф” хэмээх хочоороо алдаршиж буй түүний нэгэн ярилцлагыг толилуулъя.
  • -Дэлхийн чансаанд дөнгөж 64 дүгээрт бичигдсэн ч шоу бизнесийн салбарт олж буй амжилт тань олны анхаарлыг татдагийн нууц юу вэ?
  • -Хүмүүс намайг секс-бэлгэ тэмдэг, гольфод анхаарлаа хандуулдаггүй гэж муулдгийг мэднэ. Ингэлээ гээд би сэтгэл санаагаар огт унадаггүй.
  • -Тэгвэл сайхан царай зүс, өөгүй бие хаа спортын амжилтад ямар үүрэгтэй юм бэ?
  • -Орчин үед эмэгтэйлэг, сайхан байх гэдэг чухал нөлөөтэй байлгүй яахав.
  • -Эрэгтэйчүүдийг гольф тоглохыг ятгасан утгатай, усны хувцас өмссөн сурталчилгаа тань олны сэтгэлд их хүрсэн байна лээ?
  • -Тийм гэж үү. Гольф хэмээх гайхамшигтай спортыг сурталчилна гэдэг миний хувьд нэр төрийн хэрэг. Түүнээс гадна залуучуудыг хувцаслалтадаа анхаарч байгаасай гэсэн санаа гаргахыг оролдсон.
  • -Тэгэхээр сайхан хувцасладаг эрчүүд таалагддаг байх нь. Тийм эрэгтэй тамирчныг нэрлээч?
  • -Бейсболын “Нью-Йорк Янкиз” багийн ахлагч Дерек Жетерийг хэлнэ.
  • -Тэгвэл эмэгтэй тамирчдаас хэнийг хэлэх вэ?
  • -Хамгийн ганган тамирчин гэвэл элсний волейболч Габриэль Рис, авто уралдаанч Даника Патрик.
  • -2004 онд таны зурагтай хуанли худалдаанд гарахад АНУ-ын Гольфын холбоо нэлээд эсэргүүцсэн. Үүний шалтгааныг олсон уу?
  • -Тухайн үедээ үнэхээр гайхсан. Хожим бодож байх нь ээ төдийлэн нэрд гараагүй, чансаа багатай тоглогч хэвлэлийн од болж байгаад дургүйцлээ илэрхийлсэн юм болов уу гэж ойлгосон.
  • -Хэзээ дэмжигчид тань нүцгэн зургийг чинь “Плейбой” сэтгүүлийн нүүр хуудаснаас олж үзэх вэ?
  • -“Плейбой”-д зургаа авахуулахад хараахан бэлэн биш байна.
  • -Тайгер Вудст тохиолдсон хэрэг явдлын талаар юу хэлэх вэ?
  • -Тэр хүнд хэцүү цаг үеийг туулан гольфын талбайдаа эргэн ирсэнд баяртай байна. Гэрт нь өрнөсөн хэрүүл маргааныг шууд эфирээр дамжуулж байсан ч Тайгер талбай дээр биеэ гайхалтай авч явж, зарим тэмцээнд эхний гурван байрт шалгарч байсан нь намайг бишрүүлсэн. Жинхэнэ мэргэжлийн тамирчин л үүнийг чаддаг.
  • -Түүнтэй үерхэж байсан гэл үү?
  • -Үгүй ээ, Тайгертай нээлттэй ярилцаж үзээгүй. Уг нь бид нэг багшийн шавь нар л даа.
  • -Зодог тайлахаараа юу хийх вэ?
  • -Юун түрүүнд буяны сан байгуулж, өнчин, ядуу хүүхдүүдэд туслахыг хүсдэг. Харин дараа нь нөхөрт гарах тухай бодъё.
  • -Найз залуутай юу?
  • -Одоохондоо ганцаараа л байна даа.

Сэтгэгдэл ( 0 )

Сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.
Top