Хүүгийнхээ хагалгаанд зарцуулах 24 сая воноо санамсаргүйгээр хаяжээ

Өмнөд Солонгост хүүгийнхээ хагалгаанд зарцуулах ёстой байсан 24 сая воноо санамсаргүйгээр хаясан ээжид туслахаар цэвэрлэх байгууллагын ажилчид 24 тонн хог ангилан ялгасан явдал гарчээ. 

Өнгөрөгч хоёрдугаар сарын 24-ны өдөр Сэжон хотын цэвэрлэх байгууллагын ажилчид 24 тонн хог хаягдлыг нэг бүрчлэн шалгаж, ангилан ялгах их ажилдаа оржээ. Тус хотын хог хаягдлыг дахин боловсруулах хэлтэст цөхрөнгөө барсан 60 гаруй насны ээж холбогдон хүүгийнхээ эмчилгээний төлбөрт зарцуулах ёстой байсан 24 сая воноо санамсаргүйгээр хаясан болохоо учирласан байна. Албаныхан тэр даруй хог хаягдал устгах ажлаа нэн даруй зогсоож, хогон овоог ухаж эхэлсэн байна.

Хайлт эхэлснээс хойш найман цагийн дараа ажилчид хогийн уутнаас 50 мянга ба 10 мянган вонын мөнгөн дэвсгэртүүдээс бүрдсэн 18,2 сая воныг гарган авч чаджээ. 

Мөнгөө санамсаргүйгээр хаясан эмэгтэй энэ тухай мэдээллийг цахим орчинд байршуулснаар уг үйл явдал олны анхаарлыг ихээр татсан байна. Тэрээр "Асар том хогон овоог хараад би бууж өгсөн ч ажилтнууд хог нэг бүхийг анхааралтай шалган, мөнгөн дэвсгэртүүдийг олсон. Үүнд маш их талархаж, тэднийг гаргаж буй хичээл зүтгэлийг хараад нулимс дуслуулсан. Ямар их талархсныг минь юугаар ч зүйрлэшгүй. Тэд ямар нэгэн гавьяа, шагнал хүртээгүй ч тэд надаас бүгдийг нь олж чадаагүйдээ уучлалт хүссэн. Би Сэжон хотын ажилчдад талархснаа илэрхийлмээр байна" хэмээсэн байна. 

Үүний хариуд "Бид танд тусалсандаа баяртай байна. Бид тус болж чадсандаа өөрсдийгөө үнэхээр азтайд тооцож байгаа" хэмээгээд эмэгтэйгээс санаа зовохгүй байхыг хүссэн байна.