Монголын оюутны спортын VI наадмын нээлтэд 2200 тамирчин оролцлоо

Монголын оюутны спортын VI наадмын нээлтийн ёслол өчигдөр (2024.04.15) Спортын төв ордонд болж, 33 их, дээд сургуулийн 2200 гаруй тамирчин оролцов.

Нээлтийн ёслолд Монгол Улсын Ерөнхий сайдын зөвлөх Д.Дашням, Олимп, нийтийн биеийн тамир, спортын Үндэсний хорооны ажлын албаны дарга Э.Тэмүүжин, наадмын Зохион байгуулах хорооны дарга, БТСУХ-ны дарга О.Баттулга, Монголын оюутны спортын холбооны Д.Баясгалан нар хүрэлцэн ирж, тамирчдын төлөөлөл болж, Т.Хангал, Э.Хүслэн, Ц.Санчир, Б.Хонгорзул нар Монгол Улсын төрийн далбааг мандуулсан бол тамирчны тангарагийг Г.Болор-Эрдэнэ, шүүгчийн тангарагийг З.Оюунбилэг нар өргөлөө.

Монголын "Оюутны олимп" гэгддэг дөрвөн жилд нэг удаа болдог "Оюутны Универсад VI" наадам дөрөвдүгээр сарын 15-26-нд спортын 10 төрлөөр болж, тамирчид 533 багц медалийн төлөө өрсөлдөнө.