Д.Амарбаясгалан: 117 мянган малчин өрхөд 10 кг гурил, 5 кг цагаан будааны тусламж үзүүлнэ

Засгийн газрын өнөөдрийн /2024.02.28/ хуралдаанаар 14 аймгийн 111 суманд төмөр болон цагаархуу зудтай байгаа сумдын малчдад нэн тулгамдаж байгаа өвс тэжээл, гурил будааны дэмжлэг үзүүлэхээр шийдвэрлэлээ.

Энэ талаар ЗГХЭГ-ын дарга Д.Амарбаясгалан "Эхний ээлжид ХХААХҮЯ-ны дэргэд тариалан эрхлэлтийг дэмжих сан дээр хадгалагдаж байгаа 10 мянган тонн тэжээлийн будааг малчдад хоёрдугаар ээлжийн дэмжлэг болгож үнэ төлбөргүй хүргэж өгөх шийдвэр гаргаж байна.

Төмөр зудтай сум тус бүрд 150 тонн тэжээлийн будаа, цагаархуу зудтай сум тус бүрд 75 тонн тэжээлийн будаа өгнө. Тухайн сумын малчин өрхийн тооноос хамаарч нэг айлд хэдэн кг тэжээл хүргэж өгөх асуудал хөндөгдөнө.

Бидний тооцооллоор дунджаар нэг айлд 250 орчим килограмм будаа буюу 50 килограммын таван шуудай тэжээлийг хүргэж өгөхөөр байна.

Түүнчлэн улсын нөөцөөс 5 тэрбум төгрөг гаргах бөгөөд 111 сумын 117 мянган малчин өрх бүрд 10 кг гурил, 5 кг цагаан будаа өгнө. Уг ажлыг УОК болон орон нутгийн удирдлагууд хамтарч яаралтай хэрэгжүүлнэ." гэлээ.

 Засгийн газраас хаваржилт хүндэрч байгаа аймгуудын малчдад улсын нөөцөөс гурил, цагаан будаа, элсэн чихэр, давс, цай, ургамлын тос зэрэг нэн шаардлагатай хүнсний тусламж олгох, тээвэрлэн хүргэхэд шаардагдах таван тэрбум төгрөгийн зардлыг шийдвэрлэсан байна.

Засгийн газрын хуралдааны нэгдсэн мэдээлэлтэй /ЭНД/ дарж танилцана уу.