Төрийн албанд ороод  тэрбумтан болчихдог “МОНГОЛ ТОГТОЛЦОО”

Төрийн албан хаагчийн цалингаар тэрбумтан болсон түүх дэлхийд байхгүй. Монголын тэрбумтнуудын түүхийг сөхвөл “Буян”-гийн Б.Жаргалсайхан, “Женко” Х.Баттулга нар анх тарвага, зурамны арьс хойд, урд хилээр зөөж, гахай чирж, явган таваргаж явсан. Хэн хэн нь куртик, жинсэн өмд оёж зардаг байсан.

“Нарантуул”-ын Ш.Сайхансамбуу хүнсний дэлгүүрт ачаа зөөгч, мах цавчигч, оёдлын цехэд  эсгүүрчин хийж өгссөн. Л.Гүндалай Германд хар бор ажил хийж, хилээр автомашин оруулж ирдэг байсан. Тэд тэгж явсаар тэрбумтан болцгоосон. Бизнес хийж, үйлдвэрлэл эрхэлж, үгүй ядахдаа гахай чирсэн хүмүүс тэрбумтан байхаас яах вэ. Харин сүүлд  Монголын төр “Төрөөс төрсөн тэрбумтан” гэгчээр дүүрсэн л дээ. Гэхдээ УИХ, Засгийн газарт сайд, гишүүн болсон нөхдүүд л яригддаг байв. Гэтэл одоо дунд шатныхан эрдэнэс нуусан агуйд шургаад орчихсон аятай төрийн албанд ороод тэсэртэл баяждаг болжээ.

Хотын барилга дагасан авлигын асуудал дөнгөж яригдаж эхэлтэл 2019 оноос хойш нийслэлд ашиглалтад орсон бүх барилгын Улсын комиссыг ахалсан С.Төмөрдулам гэдэг бүсгүй тэрбумтан болчихсон байж гэнэ. Уг нь дандаа эрчүүд тэрбумтан болж байхаар ганц эмэгтэй яахав дээ гээд хэлэх гэтэл албан тушаалаа урвуулан ашиглаж авлигаар тэрбумтан болсон юмсанж. АТГ-аас нэгжлэг хийхэд Хотын стандарт, хяналтын газрын дарга, Улсын комиссын дарга С.Төмөрдулам гэгч эмэгтэй 2.5 тэрбумын үнэтэй хоёр  байртай, таван  авто зогсоолтой, үйлчилгээний нэг барилгатай. Lexus-470, 570, RX-350 маркийн гурван машинтай. Нөхөр нь мебелийн салбар дэлгүүртэй болох нь тогтоогдсон тухай мэдээлэл цацагдав.

Төрийн албан хаагчийн цалингаар тэрбумтан болчихгүй л дээ. Тэгэхдээ тэрбумтан болгодог тогтолцоо манай улсад л байна. Түүний мөрөөр цахилгаан, дулааны зөвшөөрөл өгдөг газар хэлтсийн дарга нар, мэргэжлийн хяналт гэж байх үеийн газар, хэлтсийн дарга нарыг ч гэсэн шалгавал энэ мэт тэрбумтны тоо нэмэгдэх биз ээ.