"Ажнай" Д.Бат-Эрдэнийг нүүрсний хэргээр ЭЦА-аас шалгаж байна

Өмнөговь аймгаас сонгогдсон УИХ-ын гишүүн Д.Бат-Эрдэнийг нүүрсний хэрэгт холбогдуулан яллагдагчаар татан шалгаж байгаа билээ. 

Түүнд холбогдох хэрэг ямар шатандаа яваа талаар АТГ-аас тодруулахад "УИХ-ын гишүүн Д.Бат-Эрдэнийг Эрүүгийн цагдаагийн албанаас шалгаж байгаа. Одоогийн байдлаар яллагдагчаар татсан байгаа. Эрүүгийн цагдаагийн алба шалгаж байгаа хэдий ч АТГ-ын мөрдөгчид хэргийг нь хамтран шалгаж байгаа" гэх тайлбарыг өглөө. 

Сонирхуулахад, шүүхээс УИХ-ын гишүүн Д.Бат-Эрдэнэд хилийг хориг тогтоож, тодорхой тооны хүмүүстэй уулзахыг хориглоод байгаа юм. Өөрөөр хэлбэл, түүнд холбогдох хэргийг шийдвэрлэж дуустал нь Монгол Улсын хилээр гарахыг хязгаарлах, таслан сэргийлэх арга хэмжээ авч шийдвэрлэсэн байдаг. 

Хууль хяналтын байгууллагаас УИХ-ын гишүүн, "Ажнай" Д.Бат-Эрдэнийг 2012-2016 онд парламентын гишүүнээр ажиллаж байхдаа орон нутгийн жижиг “Тавантолгой” ХК-ны ТУЗ-ийн дарга Б.Түвшинбаяр, Гүйцэтгэх захирал Р.Сэддорж нарт хууль бусаар нөлөөлж 323,900 тонн нүүрсийг өр төлбөрт авсан мэтээр хуурамч бичиг баримт бүрдүүлэн “Тавантолгой” ХК, “Тавантолгой транс”  зэрэг компанийн хувьцаа эзэмшиж байсан албан тушаалын байдлаа ашиглаж “Тавантолгой” ХК-д 18,478,856,284 төгрөгийн хохирол учруулан хөрөнгө завшихыг удирдан зохион байгуулсан хэрэгт буруутгаж байгаа юм. 

Тиймээс яллагдагчаар татаж Д.Бат-Эрдэнэд Эрүүгийн хуулийн тусгай ангийн 17.4 дүгээр зүйлийн 2 дахь хэсгийн 2.1, 2.2 дахь / Хөрөнгө завших/ заалтад зааснаар мөрдөн шалгах ажиллагаа явуулж байгаа билээ.