Сун Хын Мин: Биднийг дэмжсэн бүх хүнээс УУЧЛАЛТ хүсье

Өмнөд Солонгосын шигшээ баг "Qatar 2022" хөлбөмбөгийн Дэлхийн аварга шалгаруулах тэмцээний шөвгийн 16-д шалгарч, Бразил улсын багт 4:1 харьцаатайгаар хожигдон, харамсалтайгаар тэмцээнийг орхилоо. 

"Үхлийн хэсэг"-ээс шалгарч, боломжгүй зүйл гэж байдаггүйг нотлон харуулсан тэдний хувьд төдийгүй тус улсын багийн дэмжигчдийн хувьд хүнд өдөр байв. 

Тоглолтын дараа БНСУ-ын багийн ахлагч Сун Хын Миний өгсөн богино ярилцлагыг орчуулан хүргэж байна. 

-Та мэс засал хийлгэснээсээ хойш ердөө сарын дараа бүтэн цагийн дөрвөн тоглолтод оролцлоо. Таныг одоог хүртэл бэртэлтэй байгаа гэж сонссон. Эдгэрэлтийн явц хэр байгаа тухай асууж болох болов уу?

-Би зүгээр ээ. Багийнхны маань туулж өнгөрүүлсэн зүйлсийн дэргэд энэ юу ч биш. Би зүгээр байгаа. 

-Багийнхаа ирээдүйг хэрхэн харж байна вэ? 

-Бүгд маш шаргуу ажилласан. БНСУ-ын ард түмэн, хөлбөмбөг сонирхогчид болон биднийг дэмжиж байсан бүх хүмүүсээс уучлалт хүсмээр байна. 

Бид чадах бүхнээ хийсэн. Оноогоо ойртуулахын тулд чадах бүхнээ хийсэн. Үнэхээр ширүүн тоглолт боллоо. Гэсэн хэдий ч би багийнхнаа энэ хүртэл явж чадсанд нь баярлаж, маш их бахархаж байна. Тэд бүхнээ зориулсан. Үүний төлөө маш их хөдөлмөрлөсөн гэдэгт эргэлзэхгүй байна. 

-Тоглолтын дараа багийнхантайгаа ярилцаж байгаа харагдсан. Тэдэнд юу гэж хэлсэн бэ?

-Хамтрагчдаа талбай дээр болон амьдрал дээр маш их хичээл зүтгэл гаргасанд нь талархал илэрхийлсэн. Тэд надад маш их урам зориг өгсөн. Тиймээс тэдэнд баярлаж буйгаа хэлэх ёстой.