Тэтгэврийн зээлийн хүү 12 хувь болно

Засгийн газрын 2016-2020 оны үйл ажиллагааны мөрийн хөтөлбөрт тэтгэврийн зээлийн хүүг бууруулах ажлыг шат дараатайгаар авч хэрэгжүүлэхээр тусгасан. Тэгвэл тэтгэвэр барьцаалсан зээлийн нөхцөлийг сайжруулж, хүүг бууруулан, хугацааг уртасгахаар болов. Энэ сараас эхлэн тэтгэвэр барьцаалсан зээлийг 12 сарын хугацаатай авах бол хүү нь сарын нэг, жилийн 12 хувь болж буурах аж.

Мөн зээл авсан иргэний тэтгэврийг бүгдийг нь суутгах бус, 70 хувьд нь зээл олгож, 30 хувийг үлдээж байхаар болсон. Энэ нь ахмад настан тодорхой орлоготой байх нөхцөлийг бий болгож буй. Уг ажлыг хэрэгжүүлэхээр ХНХЯ Хаан банк, Төрийн банктай харилцан тохиролцсон юм.

Өнгөрсөн оны арваннэгдүгээр сарын байдлаар 230 гаруй мянган хүн 680.9 тэрбум төгрөгийн зээлийг жилийн 18 хувийн хүүтэй, 36 хүртэл сарын хугацаатай авчээ.

С.Чинзориг сайд “2018 оны нэгдүгээр сарын 16-наас эхлэн тэтгэвэр авагч ХААН, Төрийн банкнаас 12 хүртэл сарын хугацаатай тэтгэврийн зээл авна. Уг зээлийг авснаар 100 гаруй мянган тэтгэвэр авагч жилд 5.0 тэрбум төгрөг хэмнэж, зээлийн хүүгийн дарамтаас чөлөөлөгдөх боломж бүрдэнэ. Мөн сарын тэтгэврийг бүгдийг зээл, хүүд суутгаж байгаа нь ахмад настны амьжиргаанд сөргөөр нөлөөлж байгаа учир иргэдийн ирүүлсэн саналд үндэслэн тэтгэврийн 70 хувийг зээл болон хүүгийн төлбөрт суутгаж, 30 хувийг гар дээр нь олгож байхаар банкуудтай тохиролцлоо” гэв.

Э.Цэрэнлхагва

www.zindaa.mn