Г.Шийлэгдамба: Би амьд байгаа

МАХН-ын гишүүн  Г.Шийлэгдамба  2015 онд Эрүүл мэнд, спортын сайдаар ажиллаж байх үедээ  авлига авсан хэргээр шалгагдсан. Өнгөрөгч наймдугаар сард Г.Шийлэгдамба нарын дөрвөн хүнд холбогдох хэргийг шүүх хурал Сүхбаатар дүүргийн эрүүгийн хэргийн анхан шатны шүүхэд хоёр өдөр болж шийдвэрээ гаргасан. Шүүхийн  шийдвэрээр  Г.Шийлэгдамбад 5.1 жил, харин түүнд авлига өгсөн О.Даваасүрэнд 1.6 жилийн ял оноосон.  Мөн ЭМСЯ-ны Төрийн нарийн бичгийн дарга асан Г.Ганчимэгт 19 сая 200 мянган төгрөгийн торгууль, "Метро Нетворк”  компанийн гүйцэтгэх захирал Э.Гантулгад 14 сая төгрөгийн торгууль ногдуулсан.

Дээрх шийдвэртэй холбогдуулан УИХ-ын гишүүн О.Баасанхүү  "Г.Шийлэгдамба сайд маань 60 тэрбумын золиос болоод 5.1 жилийн ял авлаа. Сайдын төлбөрөө төлөх гэж яваад алдав. Н.Энхбаяр дарга баярлаж байгаа биз" гэж намынхаа өмнөөс түүний төлөө ганц ган хийсэн нэгэн. Өөр хэн ч дуугараагүй өнөөдрийг хүрсэн.  Тэр ч бүү хэл тухайн үед МАХН-ын нөхөд нь түүнийг донгодоно гэж хэвлэлээр хүртэл бичигдэж байв. Үүнд ундууцсан  Г.Шийлэгдамба  өөрийн цахим хуудсандаа мэдэгдэл хийж " Би амьд байгаа. Миний хэлж , тавьж буй асуудал бүгд үнэн юм. Итгэж үнэмшихгүй байгаа хүмүүсийн хувьд "Цензургүй яриа" нэвтрүүлгийг дахиж үзэж болно. Хуулийн болон нийгмийн өмнө би бүх хариуцлагыг хүлээнэ. Монголын ирээдүйн улс төрийн ямарч намын амьдралд ийм асуудал үүсдэггүй байх ёстой. Эцэст нь хэлэхэд энэ бүхний цаана ямар нэгэн улс төрийн тохироо байхгүй, миний хувьд ямар нэгэн албан тушаалд очихгүй"...хэмээн мэдэгдэж байв.

Үнэхээр  л түүний хэлсэнчлэн тэр албан тушаалд очсонгүй. Харин эсрэгээр "аавын хаалга"-ыг татав. Гэхдээ тэр амьд байгаа. Намын нөхөд нь чимээгүй байсаар л ....

Б.Алтжин