Сүүлийн өдөр барилдах дөрөв маань хэрхэн сугалаа татав
“Парис-2017” бөхийн төрлүүдийн ДАШТ маргааш өндөрлөнө. Сүүлийн өдөр эрэгтэйчүүдийн 65, 70, 74, 97 кг-ын жингийн барилдаан болох бөгөөд манай улсаас гавьяат тамирчин Г.Мандахнаран, ОУХМ Н.Лхамгармаа, Д.Гомбодорж, Ө.Батзул нар хүч үзнэ. Маргааш зодоглох манай бөхчүүд хэрхэн сугалаа татсаныг сонирхуулъя.
65 кг: ДАШТ-д анх удаа оролцож буй “Алдар” спорт хорооны тамирчин Нармандахын Лхамгармаа Агахусейн Мустафаевтай эхний тойрогт хүч үзэхээр боллоо. Түүнийг аргалбал Болгарын Николай Куртев, Беларусийн Азамат Нуриков нарын ялсантай барилдана.
70 кг: ДАШТ-ий хошой хүрэл медальт “Алдар” спорт хорооны тамирчин, Монгол Улсын гавьяат тамирчин Ганзоригийн Мандахнаран эхлээд Канадын Стэнли Асселстинтэй барилдахаар боллоо. Түүнийг “Лондон-2012” олимпийн наадмын хүрэл медальт Акзурек Танатаров, Энэтхэгийн Амит Кумар нарын ялсантай барилдана. Гавьяатын хэсгийн дээд талд олимпийн хүрэл, ДАШТ-ий алт, хүрэл медальт Италийн Фрэнк Чамизо, олимп, ДАШТ-ий медальт Украины Ихтиор Наврузов нар байна.
74 кг: Найман жилийн дараа ДАШТ-д зодоглож буй “Сүлд” спорт хорооны тамирчин ОУХМ Доржваанчигийн Гомбодорж эхлээд Польшийн Анжей Сокалскитэй оноолт таарлаа. Түүнийг ялбал Тажикистаны Гамид Жалилов, Испанийн Таймураз Фриев нарын ялсантай хүч үзнэ. Гомбоо хоёр ялбал шөвгийн наймд энэ жингийг тэргүүлж буй Туркийн Сонер Демирташтай барилдах боломжтой.
97 кг: Анх удаа ДАШТ-ий утаа үнэрлэж буй “Хүч” спорт хорооны тамирчин ОУХМ Өлзийсайханы Батзул эхний тойрогт Молдавын Николай Чибантай хүч үзнэ. Түүнийг ялбал Японы Найя Акагүма хүлээж байна. Манай хүн тун боломжийн сугалаа татсан үүнийгээ ашиглаж чадвал шөвгийн наймд олимп, дэлхийн аварга Кайл Снайдертэй барилдах боломжтой. Олимп, дэлхийн аварга “Орос танк” Абдулрашид Садулаев нөгөө хэсэгт оржээ. Тиймээс “Снайдер vs Садулаев” гэсэн мөрөөдлийн финал болох магадлал өндөр байна.
МОНГОЛЫН ЧӨЛӨӨТ БӨХИЙН ХОЛБОО
Сэтгэгдэл ( 0 )